Os hospitais de Pontevedra e O Salnés cubrirán en réxime de interinidade preto de 40 prazas vacantes
Por Redacción
A Xerencia da Estrutura de Xestión Integrada de Pontevedra e O Salnés está ultimando o procedemento administrativo para a cobertura, mediante interinidades e a través de concurso público, de preto de 40 prazas de persoal facultativo que na actualidade xa presta servizo nos centros hospitalarios de Pontevedra.
A meirande parte destes postos de traballo, que atinxen a diversas especialidades médicas, correspóndense a prazas vacantes por xubilacións que até o de agora se estiveran cubrindo sucesivamente con nomeamentos eventuais.
Coa convocatoria que está ultimando a Xerencia da Eoxi de Pontevedra e O Salnés, a través dun concurso de méritos regrado, estas prazas se ocuparán de xeito interino ata que sexa anunciada a oferta de emprego público para ser cubertas por persoal fixo. En concreto, as ditas prazas vacantes abranguen a preto de 15 especialidades médicas distintas.
A Xerencia de Xestión Integrada de Pontevedra e O Salnés prevé a apertura desta convocatoria nun período breve de tempo para levar a cabo a estabilización do cadro de persoal da área sanitaria.