A rexión chinesa que inspirou "Avatar" quere irmandarse con Pontevedra
Por Alejandro Espiño
Parece que Pontevedra segue estando de moda en China. Tras o premio recibido en Hong Kong, a aposta pola mobilidade peonil da cidade comezou a atraer o interese de numerosas localidades do país asiático. A última en facelo foi a rexión de Hunan, que expuxo a posibilidade de irmandarse con Pontevedra.
Como curiosidade, Hunan é a provincia chinesa onde se atopan as montañas de Zhangjiajie, unha paraxe natural que inspirou ao director James Cameron para crear os cumes flotantes de Pandora na película Avatar, a que máis cartos xerou de todos os tempos.
Xa se produciron os primeiros contactos entre Pontevedra e Hunan, rexión que está interesada no modelo urbano da cidade do Lérez, especialmente no ámbito relacionado coa protección do patrimonio histórico, segundo lle trasladou ao alcalde un representante desta provincia, Hugo Tian, durante unha reunión recente.
Ademais, o Instituto Urbano de Pequín convidou a Fernández Lores a impartir unha conferencia sobre a redución do tráfico rodado no centro da cidade, con vistas ao traballo que están a realizar para urbanizar o novo distrito administrativo da capital chinesa.
Este convite aínda non se aceptou, pero ao longo deste mes de setembro Pontevedra ten numerosas citas xa pechadas para divulgar os aspectos da reforma urbana realizada nos últimos anos.
Así, o alcalde viaxará o 14 de setembro a Rouen (Francia) para participar no foro Cidades en Transición, nunha mesa redonda xunto ao rexedor da cidade belga de Hasselt.
O intendente da Policía Local, Daniel Macenlle, fará o propio na universidade de Alacante o 16 de setembro; mentres que o director xeral de Urbanismo, Xosé Manuel Tato, será o conferenciante nun seminario de mobilidade urbana que terá lugar o 21 de setembro en Loulé (Portugal). Ese mesmo día, Anabel Gulías e Macenlle participarán nun encontro sobre boas prácticas en enerxía e cambio climático en Pamplona.
Tamén haberá visitas a Pontevedra. Do 20 ao 22 de setembro, Francesco Tonucci acompañará a unha delegación de alcaldes e representantes municipais de concellos da rexión de Lazio (Italia) para participar nunha xornada técnica sobre os camiños escolares.
"Estamos a tope traballando no posicionamento exterior da cidade e cada vez son máis as demandas de información, de invitacións a conferencias e viistas que recibimos", resumiu o alcalde, Miguel Anxo Fernández Lores.
Relacionadas:
-
Pontevedra, premiada pola mobilidade amable na cidade chinesa de Shenzhen
Por Redacción |
-
Un premio en Shenzhen e unha conferencia en Pekín, novos fitos de Pontevedra na China
Por Alejandro Espiño |
-
O modelo urbano de Pontevedra interesa a Vilanova de Famaliçao
Por Alejandro Espiño & Mónica Patxot |
-
Tonucci: "Os nenos son peóns e nada máis. Se a cidade non é axeitada para os peóns, resultan excluídos"
Por Alejandro Espiño & Mónica Patxot |
-
O Concello recibe a Tonucci á fronte dunha delegación italiana
Por Redacción |
-
Lores traslada a Rouen (Francia) o modelo "sen coches" de Pontevedra
Por Redacción |
-
Que é o que fai grande a Pontevedra?
Por Alejandro Espiño |
-
Lores convértese nun "heroe" para os alcaldes de Corea do Sur
Por Diego Torrado & Oskar Viéitez |
-
Tonucci: "Hai que pensar a mobilidade doutra maneira e niso en Pontevedra son os mestres"
Por Redacción |