Inician os traballos para consolidar os achados no Castro das Croas
Por Redacción
Dous anos dos últimos achados arqueolóxicos no Castro das Croas (Salcedo) deron comezo os traballos de consolidación de todo o conxunto para a súa posta en valor. O Concello avanza que o obxectivo destes traballos, que durarán dúas semanas, será actuar sobre as estruturas arqueolóxicas visibles, despois de que Patrimonio dera a súa aprobación.
Estas estruturas tiñan un tapado provisional realizado dende a última intervención. Son un tramo da muralla do castro de 14 metros de lonxitude e dous de ancho e unha cabana de 7 metros de diámetro, que probablemente foi utilizada como vivenda.
A día de hoxe son as únicas estruturas arqueolóxicas visibles, se ben con seguridade outras moitas agóchanse no subsolo agardando novas fases de escavación, segundo recordan desde o Concello.
A consolidación consiste na aplicación de distintos tratamentos e materiais que garantan a conservación ao aire libre destas estruturas e a súa preservación futura, de xeito que poidan ser visitadas e utilizadas como recurso cultural no marco do aproveitamento do xacemento arqueolóxico dende as perspectivas socio-cultural e turística.
Estes traballos son necesarios para ambas estruturas, se ben a cabana está en peor estado de conservación, xa que conserva tan só unha fiada do seu muro e incluso non está completa en parte do seu perímetro.
Como é habitual nos traballos de restauración, seguirase o criterio de "mínima intervención", é dicir, realizaranse as intervencións imprescindibles para garantir a preservación do ben sen alterar a súa morfoloxía e aspecto, de xeito que manteña o carácter do xacemento tal e como chegou ata os nosos días.
Trátase dunha actuación concreta que se suma ao mantemento da cuberta vexetal do castro que se vén realizando regularmente dende o pasado ano.
O Castro das Croas é unha aldea da Idade do Ferro situada na parroquia de San Martiño de Salcedo. Os escasos datos arqueolóxicos dispoñibles permiten falar dunha ocupación antiga entre os séculos VII-V a.C., se ben proceden da pouca superficie escavada ata agora, polo tanto non se pode saber cantos séculos estivo habitado e en que momento foi abandonado.
Relacionadas:
-
Nova vida para o xacemento do Castro das Croas
Por Redacción |
-
Continúan as actividades para difundir o Castro das Croas
Por Redacción |
-
"O Castro das Croas é moi importante dentro do proceso de desenvolvemento do mundo castrexo en Galicia"
Por Natalia Puga & Mónica Patxot |
-
Novos achados na escavación do Castro das Croas
Por Redacción |