Aprazan o xuízo contra o 'narco' do clan de 'Os Madereiros' José Lafuente ao estar hospitalizado
Por Natalia Puga
O narcotraficante José Lafuente Martínez, membro do clan arousano de ' Os Madereiros', debía sentarse este martes na Audiencia Provincial de Pontevedra xunto a outras tres persoas (unha delas a súa esposa) polos delitos de tráfico de drogas, branqueo de diñeiro e posesión ilícita de armas, pero encóntrase hospitalizado. O seu avogado achegou un escrito que acredita esta circunstancia e o xuízo quedou aprazado.
O presidente da Sección Segunda da Audiencia, José Juan Barreiro, decidiu aprazar a vista sen día, para fixala unha vez que o principal procesado se recupere da súa doenza.
Os outros tres acusados si acudiron á cita coa Xustiza e o avogado dun deles aproveitou o aprazamento do xuízo para pedir ao tribunal unha nova proba. En concreto, que se traduza ao español unha comisión probatoria enviada dende Las Bahamas, xa que ao estar en inglés dificulta o seu uso como proba na causa.
O fiscal acusa ao principal procesado, agora hospitalizado, de dous delitos contra a saúde pública, un de branqueo de capitais e outro de tenencia ilegal de armas e pide que sexa condenado a 22 anos de cárcere. Da súa esposa e os outros dous achegados que teñen sentando no banco considera que lle axudaron a introducir cocaína en España e ocultar o diñeiro logrado co narcotráfico por José Lafuente. Para a muller pídelle cinco anos de prisión.
José Lafuente xa conta con completo historial de paso polos xulgados e o cárcere, tanto polo secuestro do seu sobriño José Radío na súa casa de Sisán (Meaño) coma por tráfico de drogas (por un tribunal non español). De feito, cando foi detido pola causa pola que se acusa agora levaba pouco tempo en prisión.
A operacion Sisana na que foi detido desenvolvérona o Xulgado de Instrución número 2 de Cambados e o Equipo de Crime Organizado (ECO) da Garda Civil en novembro de 2009 e na casa do acusado en Sisán encontraron cocaína, sete armas de fogo e obxectos tan disparatados como un cairo de elefante, unha pel de serpe ou pedras preciosas.
Ademais, destaparon que Lafuente, coa colaboración dos outros acusados como os seus homes de palla, branquexaba diñeiro procedente do tráfico de drogas derivándoo a contas en Portugal ou en paraísos fiscais como Macao, Las Bahamas ou as Illas Caimán ou comprando propiedades como o chalé no que vivía en Meaño. Chegou a branquear ata nove millóns de euros, de modo que o fiscal pide que esta sexa a multa que abone en caso de ser condenado.