Un brigadista dos servizos de extinción de incendios da Xunta de Galicia resultou ferido este venres mentres traballaba nun incendio declarado na parroquia de Carballedo, en Cotobade. Segundo informou a Consellería de Medio Rural, tivo que ser trasladado en ambulancia cun corte nunha perna. 

O brigadista foi auxiliado nun primeiro momento por axentes da Garda Civil. Atopábase no medio do monte nunha zona á que resulta complicado acceder, de modo que os gardas foron quen levou aos profesionais sanitarios ata o punto do accidente. Primeiro recibiu asitencia in situ e posteriormente foi evacuado. 

No momento no que sufriu o accidente, estaba a traballar na zona da Chan, en Carballedo. Sufriu un corte profundo na parte baixa da perna que obrigaba unha rápida intervención médica.

O incendio no que resultou ferido iniciouse ás 17.44 horas deste xoves e ás 20.00 horas levaba arrasada unha superficie aproximada de 20 hectáreas, segundo o último parte de lumes da Consellería de Medio Rural. 

Na extinción deste incendio estaban a traballar este venres dous axentes, seis brigadas, tres motobombas, unha pa, un helicóptero e un avión, ata que, coa chegada da noite, os medios aéreos tiveron que retirarse e quedaron só os terrestres. 

O incendio aínda non supón perigo para ningunha poboación, pero a Garda Civil si está a traballar para prohibir o acceso a determinadas zonas de Carballedo. 

Pantalla completa