Vinte patrullas da Brilat xa vixían os montes galegos
Por Oskar Viéitez & Mónica Patxot
Desde este xoves xa están despregadas as patrullas da Brigada de Infantería Lixeira Aerotransportable (Brilat) que vixiarán os montes desde esta medianoite dentro da "Operación Centinela Gallego 2016", desde o 15 xullo e ata o 15 de setembro.
O continxente militar está composto por 20 unidades que realizarán o seu labor de prevención e vixilancia nun total de 32 municipios, repartidos nun total de sete distritos forestais, o que non quita que se cubran outros concellos que se atopen dentro do alcance visual das patrullas ou na súa zona de tránsito.
Con todo, segundo precisaron desde a Brilat, pódese modificar a zona de despregamento cando a situación o aconselle por aparecer novas zonas de risco, previa solicitude da Xunta.
Xunto ao xeneral da Brilat, Luís Cebrián Carbonell, a conselleira de Medio Rural, Ángeles Vázquez, acompañada polo director xeral de Ordenación e Produción Forestal, Tomás Fernández-Couto, asistiron este xoves ao acto de saída oficial das patrullas na Base Xeneral Morillo, na localidade pontevedresa de Figueirido.
Cebrián Carbonell é o comandante da forza despregada e responsable militar no campo, e o seu cuartel xeral é o órgano responsable para o plan e condución da operación que se activa inicialmente nun nivel de esforzo medio o que supón un total, entre o persoal das patrullas e o de seguimento da operación, de ao redor dun centenar de militares implicados diariamente.
Cabe destacar que en 2015 participaron ao longo de toda a operación preto de 600 militares, e realizáronse máis de 700.000 quilómetros.
Como novidade este ano, a capacidade de vixilancia aérea no nivel medio reforzarase con drons pilotados por control remoto, con misións de vixilancia e disuasión.
A aeronave é un modelo Raven que se lanza coa man e é propulsada cun motor eléctrico cunha autonomía de 90 minutos. Cobre unha distancia duns 10 quilómetros desde unha altura de entre 30 e 350 metros e vai equipado no morro con dous cámaras, que poden ser de visión nocturna, o que dá unha valiosa información en directo con imaxes e coordenadas da zona pola que voa.
O ano pasado xa se despregou este drone realizando un total de 40 voos.
Relacionadas:
-
Así é sobre o terreo a operación Centinela Gallego da Brilat
Por Redacción |
-
Alerta temperá da Brilat sobre 22 incendios ou conatos en dúas semanas
Por Redacción |
-
A Brilat volve esta semana ao monte por décimo ano consecutivo para unirse á campaña de prevención de incendios
Por Redacción |
-
Xunta e Defensa reeditan a operación "Centinela Gallego" para a prevención de incendios forestais
Por Oskar Viéitez |
-
A Delegación do Goberno distingue á Brilat coa gravata da Orde do Mérito Civil
Por Oskar Viéitez & Mónica Patxot |