Deteñen un 'gorrilla' por acoitelar o seu irmán dentro da Comisaría de Vilagarcía
Por Natalia Puga
A Policía Nacional detivo este xoves a un 'gorrilla' que habitualmente aparca coches na zona situada fronte á Comisaría e os xulgados de Vilagarcía por presuntamente acoitelar o seu irmán no interior das instalacións policiais.
Segundo informaron fontes policiais, todo ocorreu á primeira hora da mañá deste xoves, cando dous 'gorrillas', que ademais son irmáns, encerelláronse nunha pelexa na zona na que aparcan os coches. Nun momento dado, un deles fuxiu e refuxiouse na Comisaría, pero non lle serviu de nada, pois o seu irmán seguiuno.
A pesar de que estaban no interior da Comisaría, o presunto agresor non se cortou e acoitelou o seu irmán no pescozo. Nese momento, interviñeron os policías de servizo que estaban nas instalacións policiais, pediron axuda médica para o ferido e detiveron o agresor.
O ferido foi trasladado en ambulancia ao Hospital do Salnés e o presunto agresor foi arrestado por un delito de homicidio en grao de tentativa polo que nas próximas horas será posto a disposición xudicial.