Avanzan na selección dos novos equipamentos do Hospital do Salnés
Por Redacción
Os responsables na xestión do Hospital do Salnés mantiveron este martes en Vilagarcía de Arousa unha xuntanza con técnicos do Servizo Galego de Saúde para avanzar na planificación das últimas fases da ampliación do centro arousán.
No encontro analizáronse os novos equipamentos de aparataxe, material e mobiliario que dotarán o vindeiro outono ao centro sanitario de Ande-Rubiáns de cinco quirófanos e áreas de cirurxía maior ambulatoria e de apoio ao bloque cirúrxico.
Así mesmo, nesta xuntanza estudouse o deseño e distribución de espazos para unha nova área de esterilización no hospital arousán, que potenciará a súa capacidade asistencial con maior seguridade e eficiencia.
A nova área de esterilización complementará a ampliación e reforma do Hospital do Salnés e permite aplicar os avances das novas tecnoloxías sanitarias ao novo bloque cirúrxico, á nova área de Urxencias –xa operativa asistencialmente- e tamén aos futuros bloque obstétrico, unidade de coidados postcirúrxicos e Hospital de Día.