O Europeo de piragüismo maratón comeza a despregarse na cidade
Por Alejandro Espiño
Pontevedra comeza a prepararse para celebrar, a partir do mércores 28 de xuño, o campionato de Europa de piragüismo maratón. A organización empezou a montar as instalacións que acollerán esta importante proba deportiva que traerá á cidade do Lérez a miles de deportistas durante toda a semana.
A proba deportiva celebrarase nun circuíto de 3.600 metros, entre a ponte dos Tirantes e a ponte das Palabras (Monte Porreiro). Todo o percorrido será sinalizado para que quede perfectamente identificado para deportistas e espectadores.
No Centro de Tecnificación Deportiva (CGTD) os participantes poderán usar os vestiarios, ximnasios ou a piscina e nel estará tamén situada a oficina do control antidoping, mentres que no Pazo da Cultura situaranse as oficinas técnicas.
Ademais, a avenida de Buenos Aires e os antigos terreos de Tafisa acollerán a denominada área pre-deportiva. Alí habilitarase unha zona exclusiva para os deportistas con hangares de almacenamento de piraguas distribuídos por países, zonas comúns, baños, áreas de servizos de restauración e bebidas, fisioterapia e masaxes.
Tamén haberá unha zona comercial na que se situarán todos os expositores que estarán nos campionatos -fabricantes de barcos, pas, roupa e complementos deportivos- e unha zona village, reservada para as comidas de servizo de catering e área de lecer.
Segundo explica a organización haberá 36 canles wifi repartidos por todas as instalacións, adecuadas ás diferentes necesidades das casetas, os xuíces, a prensa e o público.
DISPOSITIVO DE TRÁFICO
A Policía Local, para este campionato, deseñou un operativo especial de tráfico. A partir deste domingo 26 de xuño cortarase ao tráfico a avenida de Buenos Aires, entre a ponte dos Tirantes e Monte Porreiro. A circulación restablecerase cando finalice o Europeo e se desmonte toda a loxística, o luns 4 de xullo.
Mentres tanto, os accesos a Monte Porreiro realizaranse desde Lérez pola ponte das Palabras ou ben pola Avenida de Lugo ou A Seca.
Relacionadas:
-
Quenda para os elite no Europeo de Maratón
Por Diego Espiño & Mónica Patxot |
-
Os deportistas Master enchen de cor o río Lérez na estrea do Europeo de Piragüismo Maratón
Por Mónica Patxot |
-
Como seguir e gozar o Campionato de Europa de Piragüismo Maratón
Por Diego Espiño |
-
Pontevedra renova o seu compromiso co piragüismo
Por Alejandro Espiño |
-
Pontevedra empeza a vivir o Campionato de Europa de Piragüismo Maratón
Por Diego Espiño |
-
VÍDEO.- O Campionato de Europa de Piragüismo Maratón de Pontevedra estrea anuncio promocional
Por Redacción |
-
Como "involucrar a toda a cidade" no Campionato de Europa de Piragüismo Maratón
Por Diego Espiño |