A Policía Local de Pontevedra, cara a unha sociedade con menos vidas truncadas
Por Mónica Patxot & Natalia Puga
Considera a Policía Local de Pontevedra que un dos asuntos que máis preocupa á sociedade na actualidade son "as elevadas cifras de vidas truncadas" e "as persoas que perden as súas funcións básicas por mor, da inseguridade viaria", de aí que ano tras ano aposte por incrementar os programas destinados tanto a mellorar a seguridade nas estradas como a educación da poboación nesta materia. Neste camiño, o outono pasado puxo en marcha unha colaboración coa Universidade de Vigo, o Concello de Pontevedra e a Xefatura Provincial de Tráfico e este venres outorgoulle un recoñecemento público.
O campus de Pontevedra da Universidade de Vigo foi un dos condecorados no Día da Policía celebrado no Pazo da Cultura. No seu caso, polo ciclo 'Cero Violencia Viaria', que resultou "un éxito rotundo", tanto de participación, como polas actividades previas, así como polos enfoques cos que foron abordados as diferentes materias.
Os decanos de Belas Artes, Fisioterapia e Ciencias da Educación, Silvia García, Eva María Lantarón e Vicente Romo, acompañaron ao vicerreitor do campus, Juan Manuel Corbacho, a recoller a felicitación e anunciar que estas xornadas serán "a primeira de moitas colaboracións que axuden a mellorar a calidade de vida da cidadanía". Todo no transcurso dun acto no que o alcalde, Miguel Anxo Fernández Lores, agradeceu o traballo de todos os axentes municipais, pois celebrar o Día da Policía Local é "celebrar que vivimos en harmonía e cada vez máis seguros".
Satisfeito "polo nivel de seguridade", Lores quixo agradecer o "duro traballo", a "enorme implicación profesional" e a "vocación de servizo público de primeira necesidade" de cada un dos membros da Policía Local de Pontevedra, que co seu traballo "elevan a calidade urbana". E non escatimou en eloxios para os "comportamentos admirables" do resto de condecorados na xornada que non pertencen ao Corpo, entre eles, a voceira da Policía Nacional en Pontevedra, Paula Novas; o inspector xefe do Corpo da Policía Nacional José Asorey; o empresario Arturo Ramírez; o xefe de Protección Civil, Hermenegildo Novoa; ou o funcionario do Concello de Pontevedra Juan Arroyo Caamaño.
Entre outras accións merecedoras de recoñecemento, a Policía Local felicitou este 2016 aos veciños de Pontevedra Eduardo Recuero González e Jorge López Rodríguez porque coa súa rápida e eficaz intervención salvaron a unha persoa cunha doenza cardíaca; ao Policía Nacional e deportista Oscar Graña porque salvou unha muller de morrer no río Lérez; ou o bombeiro José Juncal Costa, que o 19 de xuño evitou a caída dunha persoa dende unha estada na rúa Peregrina.
Protagonista do acto foron tamén nove policías locais que recibiron o seu merecido recoñecemento, entre eles o recentemente xubilado Moisés Potel Silva polos seus anos de servizo; a inspectora Pilar Peón Omil pola súa coordinación e eficaz traballo en operativos como os incendios da estación de servizo de Os Praceres e do edificio da A Ferrería e Michelena ou a explosión de gas en Médico Ballina; a policía Chabey Díaz Díaz; ou o responsable de educación viaria do Corpo, Antonio Duarte Solla.
A policía da unidade Tráfico Silvia Nogueira Pérez recibiu unha mención especial pola súa intervención unha mañá, cando aínda se atopaba fora de servizo, ao ver como un mozo tentaba subtraer unha motocicleta. Sen dubidalo, interveu, perseguiuno, conseguiu alcanzalo, reducilo e detelo antes da chegada da patrulla.
O policía Emilio Suárez Rodríguez pola súa contribución aos deseños en materia de mobilidade; os policías da unidade de Atestados Luis Miguel García Lareu e José Ignacio Cadilla Álvarez, este último pola súa labor como instrutor de tiro; e o policía da unidade de Tráfico Roberto Coego Barcia completan a lista de condecorados do día grande da Policía Local.