Cociña europea con todo o sabor das Rías Baixas
Por Alejandro Espiño
O 9 de maio conmemórase en todo o Vello Continente o Día de Europa. E aínda que para Carmela Silva, a Europa na que estamos a vivir "non é a Europa coa que estamos comprometidos" ao abandonar os seus valores tradicionais de paz, solidariedade, proxecto común, benestar ou dereitos humanos, a Deputación de Pontevedra sumarase a esta celebración cunha serie de actividades.
A primeira delas será Degusta Europa, que ten por obxectivo simbolizar a unión entre os diferentes pobos europeos empregando como elemento motor a gastronomía, ao tempo que se impulsa os mercados municipais e a materia prima da provincia de Pontevedra.
Así, a partir do próximo 3 de maio un grupo de profesorado e alumnado voluntario dos centros educativos públicos Carlos Oroza de Pontevedra e Manuel Antonio de Vigo acudirán aos mercados municipais de seis concellos pontevedreses.
Aí mesmo e de forma gratuíta, ao estilo dun show cooking, elaborarán pratos típicos de diferentes países europeos pero usando productos galegos que comprarán nos respectivos mercados.
En concreto, o profesorado e alumnado do Carlos Oroza encargarase das degustacións nos concellos de Caldas (3 de maio), Pontevedra (6 de maio) e Cambados (10 de maio).
Os do Manuel Antonio cociñarán nos concellos de A Guarda (11 de maio), Bueu (12 de maio) e Vigo (13 maio).
Os pratos realizados poderán ser degustados a partir das once da mañá e serán completamente en cada unha das seis citas.
Tanto os responsables municipais como os directores dos centros formativos Manuel Antonio de Vigo e Carlos Oroza de Pontevedra manifestaron a boa acollida do evento e a total colaboración coa Deputación de Pontevedra tanto para poñer en valor a gastronomía,os produtos locais e os mercados municipais como para reivindicar un novo modelo para Europa.
Relacionadas:
-
Cun título de graduado nunha man e un contrato na outra
Por Oskar Viéitez |
-
A Praza de Abastos de Bueu promociona os seus produtos ‘á europea’
Por Redacción |
-
Receitas gregas, italianas e inglesas pero cos produtos de casa
Por Oskar Viéitez & Mónica Patxot |
-
Que Europa queremos? A Deputación abre o debate
Por Redacción |
-
Caldas de Reis, a primeira vila que 'Degusta Europa'
Por Redacción |