Gravacións do 112, Policía Nacional e Garda Civil botan luz sobre o crime de Chancelas
Por Alejandro Espiño
Nos están robando. Tenemos mucho miedo.
Estamos dentro de la casa, encerradas en la habitación.
Hay dos hombres vestidos de negro.
Se van corriendo. Van en un coche pequeño blanco.
Todo iso, no medio de berros e saloucos, é o que se escoita nas gravacións que se rexistraron nos servizos do 112, Policía Nacional e Garda Civil o día da morte de Secundino Prego. Unha das acusadas deste crime, Albertina Táboas, recoñeceu a súa voz e a da outra acusada, Rocío Gondar, narrando o suposto roubo co que pretendían encubrir o asasinato do ancián, pero asegurou que non lembra efectuar esa chamada.
Este relato foi o máis destacado na segunda xornada do xuízo que se celebra contra elas na Audiencia de Pontevedra pola morte de Secundino Prego en febreiro de 2014, a quen segundo a Fiscalía e a acusación particular as dúas mulleres mataron a golpes para quedar coa súa herdanza, tras converter este a Albertina na súa herdeira universal apenas cinco días antes do seu asasinato.
Ademais das indicacións que as dúas acusadas dan aos axentes para que cheguen á vivenda, nas gravacións escóitase como Albertina e Rocío relatan, con todo tipo de detalles, o modo no que se produciu ese suposto roubo. A propia Albertina, que no primeiro día do xuízo, manifestara que non se acordaba de nada do sucedido entre o día do crime e a súa entrada en prisión, reiterou hoxe o seu relato do atraco a preguntas da fiscal.
Outro dos testemuños máis destacados desta segunda xornada foi o de Eduardo Prego, fillo de Secundino. Recoñeceu que Albertina chamoulle para comunicarlle que o seu pai ía convertela en herdeira universal "y yo le dije que si estaba cuidado y era lo que él quería me parecía bien". A pesar diso, afirmou que a muller "me daba mala espina" e explicou que no funeral "hacía teatro", algo que apreciou "por la forma de comportarse y lo que decía".
"Sabía que pasaba algo pero no pensé que lo matara", afirmou o fillo da vítima, que relatou como a coidadora do seu pai chegou a detallar, ante diversos familiares, como fora a morte de Secundino. "Dijo que no había muerto ni al primer ni al segundo golpe", sinalou, algo que "nos parecía extraño que nos lo dijera ella, cuando la Guardia Civil nos decía que no podía contarnos nada".
Tamén prestou declaración a muller que presentou ás dúas acusadas e que se mostrou "muy afectada" polo crime "porque las conocía muy bien a las dos". Tanto que, segundo o seu testemuño, Albertina chegoulle a manifestar que ofrecía 10.000 euros por matar a Secundino e que os pagaría "cuando el trabajo estuviese hecho". Aínda que pensou que se trataba dunha "broma o una fantasía de ella", tras a morte do ancián relatou o sucedido á Garda Civil.
Ademais, a ex parella de Albertina confirmou que a muller padecía esclerose múltiple pero asegurou que "no se le notaba" e podíase mover perfectamente, ao contrario do declarado pola muller ante o tribunal, mentres que un empregado dunha ferraxería próxima á vivenda de Secundino declarou que Albertina chegou a expresarlle que tiña "miedo" de que a vida "liberal" do ancián provocase que "lo mataran un día en la entrada de su casa".
Polo tribunal pasaron tamén veciños de Secundino que confirmaron que a luz do exterior da vivenda estaba apagada o día do crime, a traballadora da xestoría de Sanxenxo na que Secundino fixo o cambio do testamento e que explicou que Albertina estivo "en todo momento" con el durante ese trámite, ou amigos de Rocío Gondar, que sinalaron que a moza tiña previsto regresar a Santo Domingo nas datas posteriores ao crime.
O xuízo continuará o mércores co testemuño dos axentes da Garda Civil que acudiron á chamada de auxilio das dúas mulleres e os que, posteriormente, fixéronse cargo da investigación, e a exposición das probas periciais.
Relacionadas:
-
O TSXG rexeita que unha das condenadas polo crime de Chancelas teña un trastorno de personalidade
Por Oskar Viéitez |
-
Unanimidade no xurado: Albertina e Rocío mataron a Secundino "de común acordo" pola súa herencia
Por Alejandro Espiño & Mónica Patxot |
-
Unha "arrepentida" Rocío Gondar reitera que non matou a Secundino soa: "Albertina estuvo pegada a mí en todo momento"
Por Alejandro Espiño |
-
Trece golpes na cabeza, tres deles cunha pedra, mataron a Secundino Prego
Por Alejandro Espiño |
-
A Garda Civil atopou roupa con sangue de Secundino na casa das dúas acusadas
Por Alejandro Espiño |
-
Foron unha ou dúas persoas as que mataron a Secundino en Chancelas?
Por Alejandro Espiño & Mónica Patxot |
-
Xulgan as dúas mulleres acusadas de ter asasinado en Chancelas un ancián pola herdanza
Por Redacción |
-
Unha das dúas acusadas do crime de Chancelas pide saír de prisión ata o xuizo, á outra tanto lle ten
Por Mónica Patxot & Natalia Puga |