Funcionarios e traballadores do Concello de Cotobade presumen de convenio laboral
Por Redacción
A trintena de traballadores do Concello de Cotobade, entre funcionarios e persoal laboral, poden presumir xa de convenio colectivo.
Os sindicatos CSIF, CCOO e CIG, xunto aos delegados de persoal, asinaron os dous documentos, do mesmo xeito que o alcalde de Cotobade, Jorge Cubela. Trátase do primeiro acordo regulador do persoal funcionario e o primeiro convenio colectivo para o persoal laboral desta administración local.
As dúas regulacións terán unha vixencia de catro anos, ata ao 31 de decembro de 2019, aínda que se incluíron cláusulas para a súa renovación ano a ano se non se producen cambios significativos nas condicións de traballo.
Entre outros asuntos, fíxase por convenio o horario de atención ao público nas oficinas municipais, que pasa a ser de 9:00 a 14:00 horas de luns a venres e ata as 13:00 horas os sábados.
Ademais os textos inclúen aspectos relacionados coa negociación colectiva, a asistencia e permanencia no traballo, gratificacións, vacacións ou a duración da xornada, que será de 37,5 horas á semana.
"Temos un persoal moi axeitada, profesional e implicada co traballo para a mellora da calidade de vida da nosa comunidade e por iso creo que é de xustiza darlle seguridade xurídica aos seus deberes e aos seus dereitos", sinalou Jorge Cubela tras a firma cos sindicatos.