Un xuízo de sexo, atraso e bágoas
Por Anxo Lourido
O xuízo estaba previsto para as 10 da mañá na Audiencia provincial. Comezou case cunha hora de atraso. O motivo, segundo fontes xudiciais, debeuse ao despiste dos axentes das forzas de seguridade encargados de custodiar ao acusado dende a prisión da Lama. Confundiron o seu destino e en lugar de trasladalo a Pontevedra levárono aos xulgados de Vigo.
O fiscal solicitaba unha pena de 7 anos e medio de prisión para Rosalino C. C., un mozo de 26 anos de Marín, por un ataque sexual a dúas mulleres de avanzada idade en Cangas en 2011, dos que leva cumpridos case dous anos de prisión preventiva no centro penitenciario, da Lama.
O acusado recoñeceu na súa declaración ante o xuiz que en xaneiro de 2011 escoitara unha voz na súa cabeza que o inducía a ir detrás da muller de 76 anos e engadiu que "le toqué el hombro y la pierna. Se asustó, gritó y yo me marché". Sobre a tentativa de agresión sexual a unha muller de 63 anos á entrada dun edificio no barrio de San Roque de Cangas na noite do 23 de marzo de 2011, o mozo indicou que nesa ocasión fora por "un pensamiento que se me pasaba por la cabeza y que me decía que le tocase la pierna".
Os berros da muller alertaron un veciño que correu tras o mozo ata lograr darlle alcance. En ambos os dous casos, o mozo levaba un pasamontañas na cabeza que, segundo alegou, utilizaba no traballo en Marín cando tiña frío. En ambos os dous casos, Rosalino indicou que quería tocar ás súas vítimas, non violalas.
A primeira delas, moi nerviosa, declarou que o 28 de xaneiro de 2011 cando transitaba polo camiño de Darbo "alguien saltó de golpe y me agarró por el hombro. Pensé que era el vecino. Me tumbó en el suelo. Me hizo una llave y se echó encima mía. Me rompió la faja y yo me defendía como podía. Me metió la mano por debajo e hizo lo que quería y más". A muller relatou que o ruído dos fillos dunha veciña que se achegaba polo camiño fixo que o agresor fuxira. Cando o fiscal lle pediu que observase a cara do home que estaba no banco para identificalo, a muller rompeu a chorar para afirmar: "No, no quiero mirarle". Durante as preguntas da defensa, a vítima chegou increpar o avogado dicíndolle "no tergiverses las cosas", e o presidente da sala, Antonio Berengua, tivo que pedirlle varias veces que se sentara e calara.
A outra vítima tamén indicou que no momento do ataque, o mozo lle "metió la mano en el cuello. Pensé que era mi marido, como no había nadie. Y me agarró por el muslo". Ao decatarse de que se trataba dun descoñecido, a muller berrou e entón "me dejó y me fui detrás de él y le reñí". Un veciño que saíu no seu auxilio foi o que finalmente conseguiu dar alcance ao agresor. Esta muller foi incapaz de recoñer ao mozo como o seu agresor cando llo solicitou o fiscal.
Desculpas ás vítimas
Durante a vista oral testificaron ata cinco peritos especializados en psiquiatría e psicoloxía. Todos, con diferentes matices, coincidiron en determinar que o mozo sufría un leve atraso mental que, non obstante, non lle evitaba poder comprender as consecuencias dos seus actos.
A defensa mantivo a súa formulación de que o mozo é inimputable debido aos problemas psiquiátricos que padece que se manifestan na súa dificultade para comunicarse. O fiscal, pola súa banda, indicou que Rosalino é capaz de describir e matizar todo o que recorda e que, polo tanto, non sofre condutas esquizoides para ser considerado inimputable. E apuntou que dende a Fiscalía "pretendemos ser lo más benevolentes posible" e por iso rebaixou a petición de prisión a 4 anos e nove meses por agresión sexual e por tentativa de agresión sexual.
A vista oral finalizou coas palabras de Rosalino: "Quiero pedir disculpas a las señoras". Ningunha delas se atopaba xa na sala.