A sede electrónica do Concello de Pontevedra, dispoñible desde o 1 de marzo
Por Alejandro Espiño
A partir do 1 de marzo, calquera cidadán poderá facer todo tipo de trámites a través da nova sede electrónica do Concello de Pontevedra. Así o desvelou o concelleiro de Réxime Interior, Vicente García Legísima.
"É unha obriga legal, pero tamén un desexo de todo o Concello", asegurou o edil do BNG, que recoñeceu que a posta en marcha desta sede electrónica "levounos máis tempo do previsto, pero foron poucos os medios e moitos os esforzos para que funcione cun mínimo de garantías".
A través de sede.pontevedra.gal, os pontevedreses terán acceso a toda a tramitación administrativa municipal.
Inicialmente poderanse realizar tramitacións sinxelas como todo tipo de solicitudes ao rexistro municipal ou diferentes xestións tributarias.
O resto de trámites iranse implementando semana a semana, de forma que tamén se poida pagar taxas e impostos a través deste portal, solicitar o alta no padrón ou consultar o estado dos expedientes do servizo de Urbanismo, presentando mesmo a través do portal as solicitudes de licenzas.
Esta sede electrónica conta cunha parte pública na que se ofrece un catálogo de procedementos que se poden realizar e os pasos para seguir para poder cumprilos.
Ademais, inclúese un apartado dedicado á transparencia na xestión municipal, onde aparece un taboleiro de anuncios -que substitúe ao físico na entrada do Concello-, o perfil de contratante, as ofertas de emprego público, os servizos tributarios, as ordenanzas e regulamentos municipais ou os impresos que hai que presentar para calquera xestión.
Pero este portal tamén contará cunha parte privada na que cada cidadán poderá consultar os seus expedientes presentados dentro da administración, así como o pago de recibos. Para esta última cuestión, o Concello ultima un convenio coa pasarela de pago Red.es, que depende do Ministerio de Industria, para poder operar desde calquera entidade bancaria española.
Para poder acceder a este perfil privado, haberá que facelo a través do DNI electrónico, dunha certificación dixital ou ben dunha clave que proporciona o propio concello e que haberá que solicitala ante o rexistro municipal. Con este sistema, ademais, implantarase un servizo de notificacións de forma que calquera novidade que se produza nun expediente será advertido a través dun correo electrónico ao interesado.
Con este novo sistema, o Concello de Pontevedra espera que a administración municipal sexa "máis eficaz" e sobre todo que para os cidadáns sexa "máis accesible" de forma que non haxa que depender dos horarios de atención ao público e desde o propio domicilio se poidan realizar a maioría das xestións administrativas.
Relacionadas:
-
A partir do 1 de febreiro, a relación entre o Concello e as empresas será só electrónica
Por Alejandro Espiño |
-
As primeiras consultas na sede electrónica do Concello foron: para pedir lombos!
Por Redacción |
-
O patrimonio dos políticos pontevedreses, ao aire
Por Alejandro Espiño |
-
A Deputación inicia a licitación pública a través de medios electrónicos
Por Redacción |
-
O Concello de Pontevedra, pioneiro no uso do dominio .gal na Internet
Por Redacción |