O ex presidente da Deputación de Pontevedra e presidente provincial do Partido Popular, Rafael Louzán, non declarou este mércores ante a xuíza pola Operación Patos.

Segundo el mesmo explicou á saída do Xulgado de Instrución número 7 de Vigo, acolleuse ao seu dereito a non declarar ata que se resolva a petición de varios letrados de nulidade de escoitas telefónicas.

Esta mesma estratexia seguiu o que fora o seu xefe de gabinete, Luís Serantes.

Louzán estaba citado para responder acerca de obras en varios municipios da provincia e pola suposta recepción de agasallos por parte da empresa Eiriña.

Aínda que precisou que el non se adheriu a esa solicitude de nulidade das escoitas, Louzán explicou que prefire esperar a que a xuíza resolva sobre esta cuestión "delicada", e que, entón, "presentareime de novo para contestar as preguntas da xuíza e fiscal".

"Sen problema, non teño nada que ocultar", reiterou ante os xornalistas, precisando que non cometeu ningunha das irregularidades que se lle atribúen e apuntando que el era "unha persoa máis" na Deputación e que contou "cun extraordinario equipo de funcionarios".