O BNG pregunta a Ana Pastor cando se aplicará a rebaixa da peaxe entre Pontevedra e Vigo
Por Redacción
Ante a continua perda de usuarios que se rexistra nos últimos tempos na autoestrada entre Pontevedra e Vigo, a voceira do BNG no Congreso, Olaia Fernández Davila, pediu á ministra de Fomento, Ana Pastor, a través dunha pregunta parlamentaria, que indique a data en que se poñerá en marcha a rebaixa da peaxe entre Pontevedra e Vigo. Reclama tamén a contía desa rebaixa e se esta medida se vai aplicar a outros tramos da AP-9. A ministra anunciara a firma dun protocolo coa concesionaria de AUDASA para incluír a cuestión das rebaixas das peaxes.
Davila recorda que no último ano, segundo os datos de Fomento, o tráfico no tramo Vigo-Pontevedra descendeu en máis dun 8%, cifra á que hai que sumar o descenso do 6% rexistrado durante os últimos tres anos. Ademais, Olaia Fernández Davila lamenta que o custo do acordo vaia ser asumido polas arcas públicas cando a empresa concesionaria ingresa elevados beneficios con dividendos de máis de 240 millóns de euros dende 2008.
A voceira nacionalista apunta que: "ademáis de ser a peaxe máis cara da AP-9, o prezo desta peaxes, igual que outras desta autoestrada, viuse sometida a excesivas e abusivas subas que nos últimos dez anos levou a un incremento dun 50%".