A Xunta alerta dun temporal de nivel laranxa durante toda a xornada do domingo no litoral galego
Por Redacción
A Dirección Xeral de Emerxencias da Consellería de Presidencia alerta dun temporal de mar de nivel laranxa que afectará ao litoral de Pontevedra, da Coruña e Lugo, a partir da media noite do sábado 26.
Segundo as predicións da Axencia Estatal de Meteoroloxía (AEMET), espérase que a partir das 00.00 horas se produza un fenómeno meteorolóxico adverso de nivel laranxa con mar de fondo do noroeste e ondas que poderán oscilar entre os 4 e 5 metros de altura, podendo acadar os 6 metros na costa de Lugo ao final do día 27.
Tamén recórdaselle á poboación a importancia de seguir as medidas de protección como evitar aproximarse a diques ou rompentes co fin de previr un eventual golpe de mar que poida arrastrar persoas ou obxectos ou vixiar posibles caídas de obxectos desde balcóns e fiestras.
Co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos concellos das tres provincias afectadas; ás Deputacións, servizos provinciais e asociacións de voluntarios de Protección Civil e aos clubs náuticos, entre outros. Deste xeito, agárdase que se adopten as medidas oportunas para garantir a seguridade dos bens e das persoas.