As limpadoras dos centros de saúde concéntranse con medo ao impago da nómina deste mes
Por Redacción
A situación en Linorsa, a empresa concesionaria da limpeza dos centros de saúde de atención primaria e de edificios da Deputación, segue sendo preocupante. Facenda mantén embargadas as contas da empresa porque desde a dirección non se logrou reunir os avais para que lles desbloqueen as contas.
Ante esta situación, os traballadores, maioritariamente mulleres, descoñecen se cobrarán a nómina do mes de xaneiro cando xa se lles debe a metade da de decembro. Por ese motivo, iniciaron un calendario de actos de protesta que levaba a traballadoras e a representantes sindicais a concentrarse ante o ambulatorio Virxe Peregrina e na Cidade Infantil Príncipe Felipe durante este martes 26.
O persoal vese obrigada a seguir traballando pola lei de contratación administrativa, que non prevé a falta de pagamento de salarios para resolver unha concesión e a única fórmula de romper a adxudicación sería a través do incumprimento dos labores de limpeza, segundo informaba a representante da CIG, Diana Rodríguez.
Desde o comité de empresa solicitaron á dirección de Linorsa que renuncie ás concesións para que as empregadas non teñan que verse abocadas á folga ao mesmo tempo que mantiveron unha xuntanza con representantes do SERGAS para solicitar que se rompa a concesión do servizo.
Linorsa conta con 500 traballadores na provincia, 100 deles no municipio de Pontevedra.
Relacionadas:
-
O persoal de Linorsa en Pontevedra baralla convocar folga ante os atrasos e impagos de salarios
Por Redacción |
-
As traballadoras de Linorsa esixen unha solución aos deputados provinciais ante a falta de pagamentos da empresa
Por Oskar Viéitez & Mónica Patxot |
-
A Deputación apoia e defende como "xustas" as demandas das traballadoras de Linorsa
Por Redacción |
-
Traballadores de limpeza dos centros de saúde iniciarán actos de protesta por impago
Por Mónica Patxot & Anxo Lourido |
-
As traballadoras da limpeza dos centros de saúde denuncian atrasos nos pagamentos
Por Redacción |