"¡Es mi padre! ¡Encontraron una botella que mi padre tiró hace 16 años al mar!"
Por Mónica Patxot & Natalia Puga
"Este mensaje es de mi padre, estoy emocionada por la noticia". Apenas unhas horas despois de que PontevedraViva publicase que desde Tristán de Acuña, no Atlántico sur, buscaban ao autor dunha mensaxe nunha botella lanzada ao mar hai 16 anos e medio, o escritor aparecía. Con esta frase, Maica Juncal Cabaleiro comunicaba que o protagonista desta historia, Cándido Juncal Crespo, é o seu pai. Está embarcado nun pesqueiro en augas de Namibia e aínda non puideron comunicarse con el, pero a súa familia non ten ningunha dúbida de que quererá escribir o final dunha aventura que el mesmo empezou o 25 de xullo de 1999 mentres navegaba na zona da Illas Malvinas.
Maica Juncal empezou a traballar cedo este xoves e, antes de entrar, non leu a noticia publicada á primeira hora, pero non tardou en coñecela. No primeiro descanso que tivo colleu o seu móbil e ardía de actividade: "me empezaron a entrar whatsapp, llamadas (...) fotos de 'mira tu padre, le están buscando'". Enviáranlle múltiples ligazóns á noticia e, ao lela, só pensou "no me lo puedo creer". Nese momento volvéronlle á mente recordos de anos atrás, de cando os seu pai tiraba botellas ao mar durante as súas longas tempadas en pesqueiros en alta mar "y nos decía: 'pues tiré una botella, ¿te imaginas que llegara?".
Tanto ela como a súa nai e o seu irmán, que agora seguiu a 'saga' familiar de dedicarse ao mar e traballa de soldador nunha plataforma petrolífera en Trinidad e Tobago, eran coñecedores de que durante os anos 90 o seu pai lanzaba botellas ao mar e, ao regresar a casa dunha longa marea,"venía y decía: 'pues mandé una botella desde las Malvinas'". Ela lembra que un día mesmo lle dixo "buah, eso en la primera roca se te rompe", pero unha desas "cuatro o cinco" botellas que tirou chegou a bo porto. Precisamente, unha das que lanzou desde as Malvinas, que o pasado 7 xaneiro foi localizada na punta de Anchorstock por Álex Mitham, o administrador/alcalde de Tristán de Acuña, un arquipélago británico situado no Atlántico sur inscrito no libro Guinness dos récords como o lugar habitado máis afastado de calquera outro lugar habitado da Terra.
Desde aquela época, Cándido non volveu comentar á súa familia nada relacionado coas mensaxes nunha botella. Descoñecen se deixou de lanzalas ou se simplemente deixou de contárllelo, pero agora están desexosos de facerlle innumerables preguntas. Hai escasos días que se embarcou en dirección a Namibia e, durante a súa marea alí, só poden falar con el cando toca terra e se conecta a unha rede wifi. Nese momento comunícase por whatsapp ou vía Skype e agora non lles chega a hora de ter esa próxima conexión. Contaranlle que unha daquelas mensaxes que el "envolvía en plástico para que no se estropearan" estaba tan ben gardada que resistiu o paso das mareas e dos anos.
Álex Mitham localizou a botella, abriuna, a súa muller pasou o ferro, editou e traduciu a mensaxe que contiña e, tras pescudar que o escribía un mariñeiro procedente de Marín, decidiu utilizar as posibilidades que ofrece Internet para localizalo. Desde Tristán de Acuña atoparon, vía redes sociais, un perfil que se correspondía co mesmo nome que asinaba a mensaxe manuscrita, pero non o localizaron e acabou chegando a PontevedraViva unha petición de axuda para localizalo. Todo este proceso mantén "asombrada" á súa filla, que sente total admiración polo empeño da familia Mitham para dar co paradoiro do seu pai: "Que hayan hecho todo esto para que la noticia llegue aquí… es increíble".
Cando o seu pai volva á súa casa de Marín dentro dun par de meses, está segura de que quererá contactar coa persoa que atopou a súa botella. A el, que leva embarcado desde os 18 anos e, aos seus 56, só pensa na prexubilación, faralle "una ilusión tremenda" coñecer a notica e "seguro que le encantaría hasta ir allí".
A Maica dálle "mucha pena que no esté aquí", en casa, para poder contactar xa coa persoa que atopou a súa mensaxe e que o está a buscar. Ela xa lle enviou "no sé cuántos whatsapp para que los vea" en canto teña conexión, para que saiba que ten a opción de "tener el contacto o conocer a la gente que encontró la botella o compartir experiencias". E é que el enviou esa botella "con mucha ilusión" e, a pesar de que a súa familia lle decía "por qué andas con esas tonterías", el "siempre decía que le encantaría que apareciera algún día", que para el era "como dejar un legado".
"Quería que apareciern en el lugar más recóndito que pudiera imaginar… y lo consiguió", indica Maica, filla de pescador, irmá doutro home de mar e que se fixo carniceira. Está "emocionadísima" desde que soubo a noticia, tanto ou máis que se lle pasase a ela, e así llo transmite a toda persoa coa que fala. "Encontraron una botella que mi padre tiró hace 16 años al mar", contou con gran euforia esta mañá aos seus clientes, pois "yo creo que todo el mundo alguna vez tuvo esa idea de tirar una botella y pensó: '¿a dónde podrá llegar?'". E o seu pai ten a resposta: a Tristán de Acuña.
Relacionadas:
-
Este é Alex. El atopou a botella de Cándido no lugar habitado máis remoto da Terra
Por Natalia Puga |
-
Misterio resolto: así é Cándido, o autor da mensaxe nunha botella que chegou á illa máis remota da Terra
Por Mónica Patxot & Natalia Puga |
-
De Marín ao lugar habitado máis remoto da Terra, coñeces o autor desta mensaxe nunha botella?
Por Natalia Puga |