Comezan os traballos de adecentamento de Lago de Castiñeiras sen o apoio das administracións públicas
Por Redacción
As comunidades de montes que integran a Fundación Lago Castiñeiras- Cotorredondo (San Martiño e Santa Cristina de Vilaboa e San Xián e Santomé de Piñeiro de Marín) comezaron os traballos de preparación do terreos para a creación do arboreto de 59 hectáreas situado no entorno do parque forestal de Castiñeiras – Cotorredondo e que rodeará o futuro xardín botánico de 15 hectáreas que a fundación quere implantar neste enclave.
Estes traballos consisten na roza das parcelas, clareos para diminuir a densidade do arborado, o apeo de exemplares en mal estado sanitario, para a posterior plantación de especies propias das distintas colecións. Tamén se farán traballos de erradicación de acacia negra, unha especie invasora que se está estendendo por todo o entorno.
Dende a fundación sinalan que a pesar do compromiso adquirido polas distintas administracións, o financiamento destes traballos correrá a cargo das propias comunidades de montes, xa que despois de varios meses de espera ningunha administración pública está prestando colaboración, aínda que no caso dos concellos de Marín e Vilaboa e da Deputación de Pontevedra resolveron mediante acordos plenarios apoiar e colaborar coa fundación.
A fundación resalta que as comunidades de montes non renovarán os convenios de cesión dos terreos que tiñan coa Consellería de Medio Ambiente e Medio Rural, polo que pasarán a xestionar as instalación que actualmente utiliza a Xunta de Galicia como centro de recuperación da fauna, aulas da natureza, a torre de vixilancia de incendios e demais instalacións construídas, entre elas o parque biolóxico, unhas instalacións que custaron máis de 300.000 euros e que nunca se chegaron a utilizar e actualmente están convertidas nunha "silveira".
O motivo que alegan as comunidades de montes para non renovar as cesións dos terreos é que a xestión da administración foi "nefasta, despilfarradora e que levou ao entorno á situación actual de abandono". Os convenios deste tipo obrigan a administración a deixar os terreos e as instalación nun estado óptimo polo que lle esixirán, mesmo xudicialmente, "o arranxo de todos aqueles elementos do parque que a desidia da administración provocou a súa ruína".
No que respecta ás relacións coa Deputación de Pontevedra e os Concellos de Vilaboa e Marín, que mediante acordos plenarios acordaron apoiar, colaborar e integrarse na fundación, o padroado xestor quere manifestar a súa indignación xa que non se dan avances na súa integración e mesmo seguen sen conseguir reunirse co novo goberno da deputación (PSOE-BNG) tres meses despois da súa constitución.
Hai que destacar que a Deputación acordou integrarse na fundación tras unha moción presentada polo grupo socialista e apoiada polo BNG, que antes de acceder ao goberno provincial non encontraban inconvenientes en reunirse cos membros do padroado xestor dun día para o outro. Agora, denuncian que levan meses intentando reunirse con eles sen éxito.
Algo parecido acontece cos concellos de Marín e Vilaboa, que levan meses excusándose en supostos informes xurídicos que lles impedirían poder integrarse na fundación, aínda que a día de hoxe evitan confirmar si se integrarán ou non.
A pesar do abandono por parte dos políticos de todos os partidos (PP, BNG e PSOE) do proxecto de recuperación do entorno de Castiñeiras – Cotorredondo que nun principio asumiron e apoiaron (nalgúns casos cando eran oposición) desde o padroado xestor, afirman que os propios comuneiros levarán a cabo o proxecto e que buscarán o financiamento na empresa privada e mesmo no crowdfunding, xa que este é un proxecto de grande interese social e seguirán denunciando a omisión de cumprimento das súas competencias por parte da administración, tal e como recolle a propia lei de montes. Tamén denuncia as trabas burocráticas da propia administración para constituír legalmente a fundación xa que levan meses agardando que que se lle autorice o nome, e aproben os estatutos, trámites necesario para formalizar a súa constitución.
Relacionadas:
-
Críticas á marcha do Centro de Fauna Salvaxe de Castiñeiras para Cotobade
Por Redacción |
-
SOS do BNG de Marín para "salvar" o parque do Lago de Castiñeiras
Por Redacción |
-
Cotobade acollerá un Centro de Recuperación de Fauna Silvestre
Por Oskar Viéitez |
-
Responsabilizan á Xunta do abandono do parque da Lagoa de Castiñeiras e Cotorredondo
Por Redacción |
-
O Centro de Recuperación de Cotorredondo rexistrou no que vai de ano a entrada de 728 animais
Por Redacción |
-
As comunidades de montes presentarán un Plan Director para a mellora do Lago de Castiñeiras
Por Oskar Viéitez |
-
Volverán as barbacoas ao lago Castiñeiras?
Por Redacción |