Atropelan un home en Poio debido á falta de visibilidade
Por Anxo Lourido
A falta de visibilidade foi a causa que provocou que un turismo atropelara ás 8:30 desta mañá un home de arredor de 50 anos que cruzaba por un paso de peóns no quilómetro 3 da PO-308, segundo informaba o 112 á altura da oficina de Correos de Poio a poucos metros da rotonda que divide o tráfico entre a Avenida da Seca e a PO-310.
Segundo fontes policiais, no momento do atropelo chovía con forza, aínda era de noite e o condutor alegou que "non se percatara do peón ata que impactou con el", ademais a vítima do atropelo vestía con roupa de cor negra o que dificultou aínda máis a visibilidade.
O peón foi trasladado por Urxencias Médicas ao Hospital Miguel Domínguez de Pontevedra en estado consciente e con feridas que, inicialmente, non parecían revestir gravidade.