Tres persoas resultan feridas nunha saída de vía en Vilanova de Arousa
Por Redacción
Tres persoas foron trasladadas arredor das 06.40 horas da madrugada deste domingo 1 de novembro ao Hospital do Salnés para ser atendidas das feridas causadas nun accidente de tráfico preto da Igrexa de Tremoedo en Vilanova de Arousa.
Segundo informa o servizo de Emerxencias do 112, por razóns que aínda se descoñecen, o vehículo no que viaxaban os tres feridos saíuse da vía. A pesar diso, os tres ocupantes atopábanse liberados e accesibles. Os bombeiros do Salnés mobilizáronse para restablecer as condicións de seguridade na vía.
Ademais dos efectivos procedentes do parque de Bombeiros de Ribadumia, ata a parroquia de Tremoedo desprazouse unha patrulla da Garda Civil de Tráfico, os técnicos de Urxencias Médicas e membros de Protección Civil de Vilanova.