A Sección Sindical de Comisións Obreiras da Deputación de Pontevedra compareceu en rolda de prensa para valorar distintas propostas do novo equipo de goberno, relativas ao persoal e á prestación de servizos, algunhas das cales, ao seu xuízo, "vulneran a legalidade e son contrarias ao diálogo social".

José Ramón Piñeiro, delegado de Comisións Obreiras, explicou que "hai cuestións que non compartimos" como a transferencia á Xunta de Galicia do Centro Príncipe Felipe e os servizos de Mouriscade e da Estación Fitopatolóxica do Areeiro.

Neste senso aseguran que por Lei mentres non se regule o mapa de financiamento autonómico e de facendas locais "a Xunta non asumirá estas competencias nin de sanidade, nin de educación, nin de servizos sociais".

Polo que consideran que o goberno provincial está a facer unha "instrumentalización política" deste asunto e que "o que hai que facer" é mellorar a prestación destes servizos mediante un acordo de financiamento no que tamén se impliquen a Xunta e o Concello de Pontevedra.

Tamén denunciaron un "intento de privatización" do parque de maquinaria, "aproveitando" que a concesión dos terreos de dominio marítimo-terrestre que ocupa no ámbito da Xunqueira de Alba teñen como data de caducidade o ano 2018.

Ademais Comisións Obreiras critica que "debido a unha desconfianza absoluta" no traballo dalgúns funcionarios, o novo goberno provincial PSdeG-BNG, "determinadas competencias propias dous funcionarios están sendo derivadas aos seus asesores", unha actitude que cualifican de "total desprezo" e que denunciarán se é preciso ante o xulgado contencioso administrativo.

Entre outras reclamacións Comisións Obreras incluíu a "eliminación indiscriminada dás pagas de productividade e ás gratificacións".

Agora que o goberno provincial está a elaborar o próximo presuposto da Deputación, Comisións Obreras pide que lle permita participar neste proceso para poder facer as súas achegas "para buscar solucións a través do diálogo e non ter que levar aos tribunais determinadas circunstancias que poderían ter unha saída negociada".

De non existir diálogo, os responsables do sindicato acudirían "á vía da mobilización".