Os pacientes do CHOP teñen que esperar para ser atendidos a metade de tempo que o resto dos galegos
Por Oskar Viéitez
Os hospitais de Pontevedra e O Salnés lograron acadar, durante os seis primeiros meses do presente ano un importante incremento da actividade asistencial, cuns tempos de espera que os manteñen destacados dentro dos obxectivos asistenciais do Servizo Galego de Saúde, segundo revelou este venres en Pontevedra o xerente de Xestión Integrada, José Manuel González, que fixo balance das cifras de actividade asistencial do primeiro semestre de 2015.
No transcurso da súa intervención, José Manuel González sinalou que os tempos de espera nos centros hospitalarios de Pontevedra e O Salnés están por baixo dos 61,8 días da media galega, con 32,3 días de demora para unha intervención cirúrxica, espera que se reduce nos casos máis graves, prioridade 1, por baixo dos 10 días. A demora media para una primeira consulta na área integrada é de 23,8 días.
Nestes seis primeiros meses de 2015, José Manuel González destacou o funcionamento das vías rápidas de atención ao cancro de mama, colo-rectal, de pulmón e de vexiga e de patoloxías de otorrinolaringoloxía, que permitiron atender a 463 pacientes con sospeita de padecer estas patoloxías, nun prazo inferior a cinco días.
González Álvarez destacou a mellora continua na coordinación entre os profesionais do Complexo Hospitalario Universitario de Pontevedra, o Hospital do Salnés e os centros de saúde do área. Ademais da implantación de procesos asistenciais e protocolos comúns, resaltou a potenciación da telemedicina coa realización, nos seis primeiros meses deste ano, de 566 consultas en liña dos facultativos dos centros de saúde aos especialistas de alergoloxía, dermatoloxía, dixestivo, endocrinoloxía, estomatoloxía e oftalmoloxía, evitando o desprazamento do paciente ao hospital.
O xerente, que estaba acompañado pola directora de Enfermaría, Isabel Pérez, falou do programa Conecta 72, posto en marcha a mediados do mes de abril, que realiza o seguimento dos pacientes 72 horas despois de que reciban a alta hospitalaria e no que, nos seus tres primeiros meses de funcionamento, xa se realizaron 6.032 chamadas.
Relacionadas:
-
Os pacientes de Pontevedra e O Salnés, de novo os que menos agardan de Galicia para operarse e ir ao especialista
Por Redacción |
-
Nos hospitais de Pontevedra e O Salnés agárdase por unha operación 29,8 días, a demora máis baixa de Galicia
Por Redacción |
-
O Sergas controlou por teléfono a 19.000 pacientes tras ser operados o pasado ano
Por Redacción |