Once realizadores optan a gañar o premio ao mellor clip turístico no Congreso do Audiovisual
Por Daniel Santomé & Anxo Lourido
O actor e director Carlos Iglesias, coñecido pola súa película Un franco, catorce pesetas e polo seu personaxe de Pepelu no programa televisivo 'Esta noche cruzamos o Mississippi' de Pepe Navarro percorreu o centro histórico de Pontevedra dentro da visita guiada que realizaron os participantes no primeiro Congreso do Audiovisual 'Pontevedra... e acción!' que se desenvolve durante este xoves e venres no Pazo da Cultura.
Xunto a Carlos Iglesias tamén realizou o percorrido o actor galego Celso Bugallo, ademais de once realizadores que gravaron imaxes para participar no concurso ao mellor clip promocional de Pontevedra. O gañador obterá 2.000 euros de premio.
Durante a xornada deste luns analizáronse as fases de rodaxe e a experiencia de rodar na cidade. Tamén se impartiu unha clase maxistral a cargo do crítico de cine, José Manuel López Fernández.
Este venres conclúe este congreso cunha mesa redonda na que participa a directora e guionista de Fame, Anxos Fazáns; ademais da actriz, Uxía Blanco; a guionista da web serie Clases de lo social, Diana López e Manuel Lozano, o actor de La lengua de las mariposas, de José Luis Cuerda.
Durante esta última xornada do congreso organizado pola concellería de Turismo e Promoción Económica dentro da Pontevedra Film Commision coñecerase o nome do gañador ao mellor vídeo promocional.