"Non hai mortos, non foi nada, pero o susto chegounos ben"
Por Natalia Puga & Mónica Patxot
Ás 19.30 horas deste miercoles Loli Nores saíu da súa casa do lugar de Liñares para tender a roupa. Estaba no tendal cando "vin labarada" na parte de abaixo da súa casa e, de súpeto, "sentín unha explosión". Estaba a vivir en primeira persoa os inicios dun incendio que a partir das 19.45 horas sementou todas as alarmas na zona de Praceres e pouco podía sospeitar que xa non podería volver entrar na súa casa durante as seguintes catro horas.
A chama que viu iniciárase no recinto da gasolineira situada a apenas uns metros da súa casa e, en canto as Forzas de Seguridade tiveron constancia do sucedido, estableceuse un dispositivo de seguridade no que se pediu a todos os veciños que residían nun radio de 400 metros que abandonasen as súas vivendas. Ela xa só tivo tempo a entrar a coller unha chaqueta e ata as 23.30 horas, cando os Bombeiros e a Policía Local de Pontevedra comprobaron que non había perigo, non puido volver acceder.
Atrás quedaban pouco máis de tres horas e media de "angustia" para todo o ámbito e, en especial, para os veciños das vivendas que rodean a gasolineira. Por seguridade, as policías Local e Nacional estableceron que non se podía permanecer dentro de catro casas.
Tres delas estaban en Liñares, pero nunha non reside habitualmente ninguén, de modo que os directamente implicados foron os moradores de dúas vivendas, unhas 16 persoas segundo os datos finais que a concelleira de Seguridade Cidadá, Carmen da Silva, puido recoller no lugar de boca dos veciños. Do outro extremo da gasolineira houbo unha casa afectada polo perímetro de seguridade do que a Policía Nacional pediu que saísen dúas persoas máis.
Non foi necesario desaloxar a ninguén porque todos os veciños foron abandonando xa as vivendas ante o susto de ver as chamas ás porta da súa casa, pero axentes da Policía Local si que tiveron que axudar a saír a unha muller de avanzada idade que se move en cadeira de rodas e que permanecería as seguintes horas resgardada na casa duns veciños.
Mentres os bombeiros de Ponteveda e O Morrazo sufocaban as chamas e as policías Local e Nacional de Marín e Pontevedra, Protección Civil e a Garda Civil establecían un cordón de seguridade para evitar maiores riscos na zona, unha vintena de veciños observaron dende un alto discorrer dos acontecementos. A maioría non podían volver ás súas casas e o resto vivían nas proximidades e compartían o "medo ao que poida pasar", pois recordaban a perigosidade dun lume nun recinto cheo de depósitos de gasóleo e estaban asustados pola espesa nube de fume negro que se apoderou do ceo durante horas e o forte olor a queimado que impregnou o ambiente por momentos.
"Non hai mortos, non foi nada, pero o susto chegounos ben", valoraba na zona Loli Nores. Aínda faltaba unha hora e media para que puidese volver á casa e terían aínda tempo por diante para compartir experiencias cos veciños. "Explosións houbo bastantes", contoulle a súa veciña Dolores Sartal, que reside noutro punto da parroquia, pero estaba nas proximidades da gasolineira cando empezou o incendio. "Ao principio, co lume e explosións tiñamos medo a que explotase todo", engadiu outro veciño.
"Susto? Imaxine o lume pegado á porta da casa", repetía Juan Carlos Meijón, que nos momentos iniciais do incendio chegou a coller unha máquina de auga a presión para apagar un conato que se iniciou na parte da súa parcela máis pegada á gasolineira. Na súa casa pasaron medo, en especial, polos tres nenos menores de idade e porque non deixaban de imaxinarse "que isto pasase ás dúas dá mañá, cando todos estamos a durmir" e non lles dese tempo a avisar aos servizos de emerxencia. As suposicións do que podería ter pasado repetíanse nas rodas de veciños, que agradecían que o vento non houbese avivadado as chamas cara ás casas, pois "menos mal que sopraba do norte, que senón... ".
"Ao principio, co lume e explosións tiñamos medo a que explotase todo"
Estas vivencias compartíronas nun cruzamento de camiños do lugar de Meán cos concelleiros Carme da Silva e Demetrio Gómez, que permaneceron na zona ata que xa todos puideron volver ás súas casas, e durante boa parte da noite tamén co alcalde de Pontevedra, Miguel Anxo Fernández Lores. A tensión que se vivía provocou que en momentos puntuais os veciños trasmitisen aos políticos queixas e reproches porque "isto xa se podía ver vir", segundo mantén unha señora de 73 anos residente nunha das casas afectadas. Juan Carlos Meijón recordoulles que el presentou unha denuncia por presuntas irregularidades na gasolineira no mes de setembro de 2014.
A tensión relaxouse a partir das 23.00 horas. Minutos antes os bombeiros deran por controlado o incendio, pero os mandos policiais e dos servizos de emerxencias optaron por manter o perímetro de seguridade durante un tempo máis por precaución. Os veciños seguían fóra de casa, pero as caras deixaron de trasmitir tanta angustia e o alivio apoderouse das súas expresións cando, ás 23.30 horas, dous bombeiros e varios policías foron a buscalos para pedirlles que lles abrisen as súas propiedades. Revisaron unha a unha todas as casas da zona para comprobar se se viran afectadas polo lume e se o fume xerado polas chamas permitía que estivesen no interior.
A revisión tivo resultados positivos, comprobaron que o lume non queimou ningunha desas propiedades e, malia que o olor a fume o impregnaba todo, non presentaba niveis inasumibles para o ser humano. O Concello de Pontevedra trasmitíralles que tiña preparado un protocolo de evacuación polo que se facilitaría que durmisen en hoteis ou mesmo nun albergue privado -en caso de que houbese un desaloxo masivo-, pero non foi necesario, pois todos optaron por volver á súa casa.
Un tempo antes tamén puideran regresar aos seus domicilios outros cidadáns afectados indirectamente polo incencio, persoas que camiñaban pola zona no momento en que se estableceu o perímetro de seguridade que non puideron seguir o seu camiño. María Pereira era unha delas, acudiu dende Marín a pé á zona do poboado de Celulosas para atender á súa sogra e, cando regresaba á casa, "aquí quedé, empantanada", pois ata as 23.00 horas a estrada vella de Marín estivo cortada.
Quedou sen cazadora porque "se la dejé a una niña que estaba desalojada" e permaneceu varias horas "muerta de frío", ata que un policía local que non formaba parte do operativo de seguridade lles levou á súa casa utilizando outra estrada diferente ela e a outro afectado, Ángel Luis Godar, que chegou a reprochar a Lores que non lle facilitasen algún método para ir á súa casa, pero os membros do operativo policial lle explicaron que o facían por motivos de seguridade.
Relacionadas:
-
Trasladar as gasolineiras do Burgo e Benito Corbal, obxectivo de Marea Pontevedra
Por Redacción |
-
As primeiras investigacións aportan "indicios" de que o incendio de Praceres foi "accidental"
Por Alejandro Espiño |
-
Un incendio na gasolineira de Praceres provoca varias explosións e obriga a acordoar a zona
Por Redacción | Creada e actualizada