A Deputación de Pontevedra adxudicou este venres, na súa xunta de goberno, a construcción dun Centro de Servizos e Apoio Empresarial no polígono industrial de Barro-Meis á empresa Construcciones Abal en 706.141 euros e un prazo de execución de nove meses.

Ao concurso presentáronse 25 empresas e pasaron o corte 14. A obra, que será levantada nunha parcela de 5.136 metros cadrados, foi adxudicada cun 21% de baixa pois a licitación era de 898.641 euros e as melloras ofertadas pola empresa son de 70.000 euros.

Unha vez adxudicado o Viveiro de Empresas que acollerá no parque industrial a novos emprendedores, e despois de que o polígono acadara unha porcentaxe de ocupación de máis do 50% a Deputación quere complementar o desenvolvemento urbanístico do parque cun Centro de Servizos e Apoio ás empresas instaladas que, ao tempo, proporcione novos espazos para a celebración de reunións, oficiñas, salas, auditorio, servizo de restauración, cafetería e outros.

O novo centro será un edificio de planta baixa, primeira e baixo cuberta. Na planta baixa albergaráse unha cafetería, servizos e oficiñas. Na primeira, un espazo para auditorio e salas multiusos ademáis de almacéns e outras dependencias. No baixo cuberta, irán os cuartos precisos para o funcionamento e ubicación das instalacións.

A edificación terá unha forma baseada en volumes ortogonais, cunha superficie útil próxima aos 1.200 metros cadrados.