A policía falecida nun tiroteo cun atracador en Vigo residía en Pontevedra
Por Natalia Puga
Vanessa María Lage Carreira, a oficial de policía falecida este venres no trascurso dun tiroteo cun atracador en Vigo, residía na cidade de Pontevedra. A moza era natural da Coruña e traballaba en Vigo, pero tiña o seu domicilio na capital, dende onde se desprazaba para prestar servizo na Unidade de Prevención e Reacción (UPR) da Comisaría da Policía Nacional, segundo confirmaron axentes destinados á Comisaría pontevedresa.
A muller recibiu polo menos tres tiros no pescozo e presuntamente tamén no peito cando lle deu o alto a un atracador que posteriormente tamén resultaría falecido. Nun primeiro momento quedou tirada no chan da rúa Doutor Carracido de Vigo, foi atendida por varios compañeiros policías e polos servizos médicos que se desprazaron ao lugar. Conseguiron reanimala e foi trasladada ao Hospital Meixoeiro, pero falecía pouco despois. No momento do tiroteo non levaban chaleco antibalas nin ela nin o seu compañeiro que resultou ferido.
A muller, de 36 anos e que ingresou no Corpo Nacional de Policía no ano 2005, será velada previsiblemente nunha capela ardente que se instalará na Comisaría de Vigo, se ben a decisión final será da familia. Si transcendeu que o enterro se celebrará en Guitiríz.
No mesmo tiroteo no que faleceu esta policía caeu abatido o atracador que desencadeara o enfrontamento e resultou ferido de gravidade o seu compañeiro de patrulla, o subinspector de 41 anos Víctor A.B., que segue loitando pola súa vida con cinco impactos de bala no Hospital Xeral Cíes de Vigo. A subdirectora do banco, que fora tomada como refén, sofre unha ferida nun brazo e recupérase no Hospital Povisa.
O desencadeante dos feitos foi un atraco rexistrado sobre as 14.15 horas deste venres na sucursal de Abanca na rúa Doutor Carracido,en o barrio do Calvario. Cando o atracador entrou, o pesonal puido avisar a Policía, de modo que cando se dispuxo a abandonar a oficina, portando o botín, xa o esperaba fóra unha patrulla, na que estaba a moza falecida.
A patrulla chegara e, ao velo, botouse a un lado e esperouno fóra. El saiu coa subdirectora do banco como refén e armado cunha pistola do calibre nove milímetros 'parabéllum' e dous cargadores. Os policías déronlle o alto e empezou a dispararlles, chegando a alcanzar ambos os dous con varios disparos. Tamén arremeteu contra unha segunda patrulla policial que acudiu como respaldo.
Finalmente, os dous axentes e a refén resultaron feridos (Vanessa logo falecida) e o atracador tamén caeu abatido e faleceu no acto. Resultou ser un delincuente con antecedentes policiais por delitos violentos.
Relacionadas:
-
Renden homenaxe á pontevedresa Vanessa Lage, asasinada en Vigo hai oito anos
Por Redacción |
-
Sindicatos policiais critican a entrega de chalecos antibalas "con arranxos tipo Pepe Gotera e Otilio"
Por Redacción |
-
"Decepción" entre os sindicatos policiais pola "maquillaxe" da repartición de chalecos antibalas
Por Oskar Viéitez |
-
Relevo na cúpula de Defensa en Pontevedra
Por Natalia Puga & Mónica Patxot |
-
Unha homenaxe "agridulce" á Constitución, cun recordo permanente á axente morta en Vigo
Por Alejandro Espiño & Diego Torrado |
-
Detido por inxuriar á Policía no Facebook a raíz do atraco cunha axente morta en Vigo
Por Natalia Puga |
-
Só o 20% dos policías da Comisaría de Pontevedra teñen chaleco antibalas
Por Natalia Puga & Mónica Patxot |
-
Bandeira a media hasta para recordar a Vanessa, unha policía "muy activa y solidaria"
Por Natalia Puga |