Asaltan de madrugada unha casa de Tomeza e deixan unha octoxenaria coas mans atadas
Por Natalia Puga
A Unidade de Delincuencia Especializada e Violenta (UDEV) da Policía Nacional mantén aberta unha investigación para localizar os autores dun roubo rexistrado na madrugada do sábado ao domingo nunha casa de Tomeza. Para poder perpetralo sen interrupcións, ataron as mans á propietaria da vivenda, de 83 anos.
Segundo os datos que manexan os investigadores, a muller estaba soa na casa. Ata o momento non puido aclararse como entraron os ladróns, pois as primeiras probas e rexistros realizados no lugar constataron que non hai ningunha porta forzada.
Unha vez dentro, ataron as mans da octoxenaria con fita americana e empezaron a revisar o interior da casa en busca do seu botín. Leváronse, segundo a propietaria, uns 800 euros en metálico e deixaron todo revolto, de modo que nun primeiro momento pensaba que tamén podían terlle roubado xoias, pero eses efectos apareceron.
Unha vez que os ladróns abandonaron a casa, a muller se asomou á ventá e empezou a pedir axuda, de modo que un veciño a sentiu, socorreuna e alertou a Policía Nacional. A consecuencia dos feitos e da tensión que acababa de vivir, a octoxenaria sufriu un ataque de ansiedade e tivo que ser trasladada ao Hospital Montecelo para recibir asistencia. Non presentaba ningunha lesión.
Fontes da Comisaría Provincial de Pontevedra confirmaron que sobre as 4.00 horas da madrugada do sábado ao domingo recibiron unha chamada dun veciño de Tomeza alertando dun roubo nunha casa próxima e a partir dese momento se desprazaron ao lugar tanto varias patrullas de seguridade cidadá como a Policía Científica. A investigación acabouna asumindo a UDEV, que agora realiza novas indagacións e está pendente de entrevistarse tamén cos fillos da vítima para facer inventario dos bens subtraídos.