Os actos conmemorativos do 12 novembro, data na que se lembra o exemplo de loita pola democracia e a liberdade dos 10 pontevedreses fusilados no ano 1936, atrasaranse durante uns días para facelos coincidir coa instalación do conxunto escultórico conmemorativo que está a realizar o escultor pontevedrés Sergio Portela.

Así o acordaron os responsables das concellarías de Cultura, Anxos Riveiro, como responsable da celebración da efeméride, e o tenente de alcalde e concelleiro de Urbanismo, Antón Louro, impulsor da realización desta peza escultórica.

Pontevedra contará así, nunha esquina do espazo popularmente coñecido como a pasarela, cun elemento artístico permanente para significar o fito histórico que concluíu coas tráxicas mortes de Amancio Caamaño, Telmo Bernárdez, Luís Poza, Paulo Novás, Germán Adrio, Benigno Rey, José Adrio, Víctor Casas, Juan Rico e Ramiro Paz.

Por outra banda, os dous departamentos municipais acordaron aproveitar estes actos, en cumprimento dun recente acordo plenario, para render tamén homenaxe a todo o persoal municipal que sufriu represión polo seu apoio ao goberno democrático da República.