Bruxas, pantasmas e cabazas volven ás aulas
Por Redacción
Bruxas, pantasmas, momias e vampiros volven estes días ás aulas.
Este mércores foron os protagonistas da xornada na Escola Infantil do campus, que deixou de lado os uniformes por un día para dar renda solta a súa faciana máis aterradora con gallo da súa adiantada Festa do Samaín.
Coa colaboración dos pais, os nenos acudiron ao centro disfrazados para a ocasión, ao igual que fixeron tamén as súas profesoras, para gozar todos xuntos dunha mañá de música e xogos no patio dunha escola que ao longo da presente semana está a promover diferentes actividades vinculadas con esta festividade de orixe celta.
Aínda que é na noite do venres, véspera de Todos os Santos, cando se festexa o Samaín, as escolas infantiles e os colexios adiantan as actividades arredor desta cita.
Os profesores esméranse en explicar a súa orixe, en que consiste a festa, e na decoración das cabazas.
No caso do CEIP Carballal de Marín, a ANPA do centro construiu una casa do terror que comeza xa no vestíbulo do centro, pola que pasearon, con moito medo, os alumnos, atopándose a distintos personaxes: Frankestein, Drácula, a bruxa, o chepudo, o zombi ou a nena do exorcista.