A Casa Azul e o CIM organizan uns 40 cursos neste último trimestre do ano
Por Redacción
A Concellaría de Benestar Social Municipal abre o vindeiro 1 de outubro a inscrición na nova programación da Casa Azul, de outubro a decembro. Ofreceranse unha ampla variedade de cursos para todos os públicos, tanto para adultos, como para nenos e tamén para familias. Serán en total 30 cursos, que se poden consultar neste enlace.
Ademais, o Centro de Información á Muller (CIM) de Pontevedra organiza outros dez cursos que, ao igual que os anteriores, están abertos a toda a cidadanía. A oferta para este último trimestre do ano inclúe: ioga, Iniciación á costura, Corte e confección, Cerámica do Nadal, Xoguetes de antano, Fofuchas e máis, Muller e benestar, Ecofeminismo práctico, Internet básico e Internet avanzado.
As persoas interesadas en calquera destes cursos poderán inscribirse no Rexistro Xeral do Concello ou ben por fax no teléfono 886 21 28 43. A data límite é o 8 de outubro.