Propoñen unha consulta cidadá entre os pontevedreses sobre o convenio taurino
Por Oskar Viéitez
Días despois de que a concelleira de Festas, Carme da Silva, anunciase que o Concello de Pontevedra manterá a integridade do convenio bianual asinado con empresarios taurinos, a análise realizada conxuntamente pola Asociación Animalista Libera e da Fondation Franz Weber cuestiona a idoneidade do acordo, e aposta por "vías de participación cidadá" para consultar sobre a súa continuidade.
Ambos os dous colectivos sinalan a posibilidade de que a casa do concello pontevedresa convoque unha consulta popular para que sexa o conxunto da cidadanía quen decida sobre se se debe manter o convenio no seu conxunto, débense revisar e eliminar algúns apartados, ou se se debe rescindir completamente. Os animalistas entenden que o desembolso para estes dous anos (2014-2015) de 95.000 euros supera con moito a utilidade que o goberno municipal pode dar ás instalacións.
Neste sentido, e como apuntou a pasada semana a plataforma Galicia, Mellor Sen Touradas, existe alternativas factibles á propia praza de touros, como o campo de fútbol de Pasarón ou o Recinto Feiral, e mesmo se poden empregar os espazos públicos para adaptalos a toda clase de actividades, como se vén facendo para a programación musical das Festas da Peregrina.
Dende a entidade suíza entenden que a mensaxe enviada dende Pontevedra a favor do mantemento dun acordo económico coa armazón taurina supón un "grave erro estratéxico" do grupo de goberno. De feito, os animalistas helvéticos cuestionan o "suposto aforro" mostrado nun estudo que nunca se divulgou con anterioridade, e que "parece elaborado ex profeso para tratar de defender a subvención".
A Asociación Animalista Libera tamén pon en dúbida a vantaxe comparativa de pagar por usar a praza de touros a prezos que están absolutamente fóra do "mercado" e das comparativas con recintos similares, como o Multiúsos de Illumbe, en San Sebastián, ou o Coliseum da Coruña.
Tamén existen coincidencias argumentais das organizacións animalistas en relación ás "prebendas outorgadas polo propio concello á empresa organizadora dos eventos taurinos". O propio convenio permite a instalación libre de publicidade agresiva visualmente en mobiliario público, así como a ruta de vehículos con megafonía, extremos que noutros municipios galegos están regulados ou directamente prohibidos.
Finalmente propoñen que o hipotético referendo se celebre en coincidencia coa convocatoria de eleccións municipais, co conseguinte aforro de medios e fondos para a administración local. Os animalistas reclaman esta ferramenta como recuperación da democracia directa e a promoción da participación cidadá en asuntos que lles poden interesar, como o feito de estar pagar decenas de miles de euros a unha empresa que se lucra con espectáculos de maltrato animal.
Relacionadas:
-
Que vos parece trasladar a sede da UNED á praza de touros?
Por Redacción |
-
'Galicia, Mellor sen Touradas' propón reconvertir a praza de touros en hotel
Por Redacción |
-
A recollida de sinaturas para pedir a supresión do convenio municipal coa Praza de Touros bate marcas
Por Redacción |
-
Touradas fóra de Pontevedra inicia unha campaña contra o convenio entre Concello e Praza de Touros
Por Diego Espiño |
-
Os abolicionistas cuestionan as "escusas municipais" sobre o convenio taurino
Por Redacción |
-
O Concello manterá o convenio coa Praza de Touros por ser "claramente beneficioso" para a cidade
Por Alejandro Espiño |
-
Máis de 30.000 sinaturas en once días para que se suprima o convenio municipal coa Praza de Touros
Por Redacción |
-
O PP pide que Lores afirme publicamente que o Goberno local financia as corridas de touros
Por Anxo Lourido |