O dispositivo de seguridade do Combate Naval implicará 80 persoas por terra e aire
Por Redacción
Un total de 80 persoas formarán parte do operativo especial de seguridade que se porá en marcha o sábado con motivo da celebración do Combate Naval de Vilagarcía. O dispositivo é similar ao do ano pasado, pero elévase o número de efectivos implicados, ampliarase o perímetro de seguridade en terra e intesificaranse os controis por mar.
O Concello acolleu este xoves a última reunión de coordinación do operativo, que ten como obxectivo garantir o normal desenvolvemento da actividade para que os milleiros de persoas que acoden a velo gocen del con total seguridade; así como atender de xeito inmediato as posibles incidencias que poidan ter lugar e que soen ter máis que ver cos desprazamentos e aglomeración de persoas, que co propio espectáculo pirotécnico.
O operativo estará coordinado e dirixido dende o Posto de Mando que se constituirá ó redor das 22.30 horas na unidade móbil da Axencia Galega de Emerxencias emprazada nas inmediacións do Posto de Socorro da Praia da Compostela. Os mandos dos corpos de seguridade e responsables das administracións estarán nese posto de mando, mentres que o resto dos efectivos distribuiranse por toda a área comprendida entre o peirao do Ramal e as praias da Concha-Compostela, co obxecto de atender coa maior brevidade calquera incidencia que poida producirse.
Ademais, operarán por mar varias embarcacións do servizo municipal de Emerxencias e da Garda Civil do Mar para que ningunha embarcación entre na área de exclusión da navegación que se establece para garantir a seguridade durante os fogos acuáticos.
Ademais das ambulancias habituais, situaranse outras nas inmediacións dos aseos da Concha e outra xunto ao Posto de Mando e durante a celebración do evento permanecerá en funcionamento o posto de socorrismo da praia, dotado con persoal e material sanitario.
De xeito preventivo, tamén se disporá de varios vehículos de extinción de incendios do servizo de Emerxencias e dos Bombeiros. Colocaranse no lateral das naves de Riasa, no Ramal; dentro da zona portuaria dende a que se instalarán os sistemas de lanzamento pirotécnico; e xunto ao Posto de Mando.
Dende o Servizo Municipal de Emerxencias prégase aos asistentes ao Combate Naval que respecten as zonas de seguridade, non se concentren nunha mesma zona e que fagan a chegada e a saída da zona das praias de xeito escalonado e con tranquilidade para evitar as típicas aglomeracións.