Moreira acusa de "cínico" a Lores por criticar as corridas de touros mentres subvenciona a empresa da praza
Por Redacción
O voceiro da oposición, Jacobo Moreira, cualificou de "extremadamente cínico" que o goberno que lidera Miguel Anxo Fernández Lores critique os espectáculos taurinos e ao mesmo tempo subvencione a empresa da praza. Segundo o presidente do Partido Popular local, "o de Lores coas corridas de touros é outra mostra da súa hipocrisía" e sinala que dende o goberno municipal se aplaude en silencio os evidentes beneficios económicos e turísticos que supoñen para a cidade de Pontevedra.
Os populares defenden que se subvencione esta feira e denuncian a nula publicidade que o goberno local ofreceu en anos anteriores ao convenio que manteñen cos irmáns Lozano, propietarios do recinto taurino.
"Que o Concello estea a dar 47.500 euros á empresa da praza e que ao mesmo tempo o alcalde se postule de forma vehementemente contra as corridas de touros só é unha mostra máis dunha hipocrisía que debería incomodalo" afirma Jacobo Moreira e engade que a Lores "nin sequera lle importa que o seu socio de goberno apoie con entusiasmo estes eventos, nin que algún dos seus concelleiros do grupo nacionalista sexa un habitual no coso de San Roque".
Moreira aproveita para criticar que, ao seu entender, o alcalde mantén con frecuencia posturas contraditorias. Neste sentido, o voceiro popular refírese aos quince anos que Lores pasou criticando o sistema do tratamento de residuos sólidos urbanos de Sogama ata que "a Deputación lle abrise finalmente a porta a unha hipotética saída para a súa hipócrita postura", indica nun comunicado.
Do mesmo modo, fai referencia ás críticas do alcalde ás grandes corporacións financeiras, económicas e industriais "mentres permite que en Pontevedra os principais servizos urbanos estean en mans de grupos empresariais foráneos de similar envergadura".
Relacionadas:
-
Miguel Filgueira: "Cando entrei no BNG xa era taurino"
Por Natalia Puga |
-
5.500 sinaturas en dous días para pedir que se suprima o convenio municipal coa Praza de Touros
Por Natalia Puga |
-
Anova pide ao Concello que suprima o convenio coa empresa propietaria da Praza de Touros
Por Redacción |
-
Carme da Silva: "Asinamos un convenio coa praza porque nos interesa utilizala"
Por Diego Espiño | Creada e actualizada
-
Concorrida manifestación contra os festexos taurinos en Pontevedra
Por Diego Espiño |