130 toneladas de entullos e unha moto: así baleiran o edificio en ruínas da Verdura
Por Natalia Puga & Mónica Patxot
Pouco antes das tres da tarde do 23 de xullo un forte ruído procedente do interior dun edificio deshabitado facía saltar as alarmas. Acababa de derrubarse parte do tellado e os tabiques e, por prevención, acordoáronse e apuntalaron as fachadas que dan ás prazas da Verdura e A Leña. Xusto unha semana despois, este mércores 30 de xullo, a escena é ben diferente. Catro obreiros traballan dende o luns para baleiralo por completo e, desta forma, evitar que se caia. Dous días despois consideran que o perigo de colapso pode darse por superado, pero aínda teñen moito por facer: calculan que retirarán 130 toneladas de entullos.
Valos de obra protexen ambas as dúas fachadas e seguen apuntalados, pero precintos, estadas e reixas non impiden que os curiosos se asomen para intentar descubrir que pasa no interior. A trasfega é continua e en dous días e medio veciños, hoteleiros e comerciantes xa viron alí estacionados oito camións. Non son de gran tamaño polas dificultades de acceder a esta céntrica zona do casco histórico, pero todos marcharon cheos e os traballadores calculan que se levaron xa 30 metros cúbicos de tellas, ladrillos, ferros, madeira, cemento... ou, o que é o mesmo, 30 toneladas de lixo.
Os traballos estaos a realizar a empresa Ediserpo por encarga do Concello de Pontevedra, que xusto despois da derruba parcial decidiu contratar o baleirado completo do edificio para garantir a seguridade dos viandantes e dos edificios contiguos, construídos parede con parede e que se podería ver afectados ante un novo derrubamento. A factura pagarana os novos donos do edificio, pero no momento non puideron ser localizados e tívose que tomar esa decisión de emerxencia tras comprobar que a estrutura estaba afectada.
As 30 toneladas de entullos que xa se retiraron cambiaron por completo o aspecto interior do inmoble, no que xa penetra unha intensa luz natural. Da cuberta case non queda rastro, pois, segundo explicaron os traballadores a PontevedraViva, neste tipo de situacións, cando un edificio neste estado xa sufriu unha derruba parcial, hai que empezar o baleirado de arriba a abaixo. Neste caso, puideron comprobar que cederan as vigas e xa tiraron todos os pisos e paredes interiores que podían supoñer algún perigo.
O encargado da obra calcula que os traballos de baleirado durarán unhas dúas semanas, nas que prevén retirar outras 100 toneladas de cascallos, pero a súa tarefa prolongarase durante un mes, pois, unha vez baleiro, haberá que poñer vigas provisionais no interior, asegurar a estrutura e logo retirar os puntais que agora suxeitan as fachadas.
Finalizado o seu labor, o aspecto exterior do inmoble será o mesmo que o 23 de xullo antes do forte ruído, pero dentro non haberá nin punto de comparación. Quedará como un espazo diáfano de 130 metros cadrados e tres alturas pola fachada da Verdura e dous e unha bufarda pola Leña. E terán desaparecido os entullos, pero tamén os mobles que aínda quedaban no o edificio malia levar anos deshabitado, quilos e quilos de libros, cantidades inxentes de lixo e mesmo unha moto.