Jacobo Moreira aposta por "suavizar" a lei de Gallardón
Por Redacción
O voceiro do grupo municipal do Partido Popular, Jacobo Moreira, é partidario de suavizar o contido da nova lei de taxas xudiciais que entrou en vigor o pasado xoves, atendendo, principalmente, "á situación económica de cada persoa".
O concelleiro do PP levou ante o pleno municipal una iniciativa para mostrar ao Goberno Central a súa "desconformidade" con algúns dos contidos da lei e solicitar á súa modificación. Moreira presentou a súa proposta en forma de emenda de substitución doutra iniciativa do PSdeG-PSOE, que rexeitaba todo o proxecto lexislativo sen "especificacións construtivas".
Pola súa banda, o documento de Moreira pedía cambios da norma en varios aspectos. Por exemplo: establecer a taxa por tramos, en función da renda do cidadán. "A nova lei introduce novas taxas cunha parte lineal, que entendemos que non debería ser igual para todo o mundo, senón ter en conta a capacidade económica da persoa que accede á Xustiza", explicou.
Así mesmo, Moreira solicitaba que se excluíran os recursos de suplicación na orde social do feito impoñible das taxas xudiciais, e que se incentivaran os acordos transaccionais elevando a bonificación ao 100% no caso de chegar a un pacto entre as partes.
"Entendemos que se debería incentivar ao máximo a adopción de pactos transaccionais que poñan fin aos litixios xudiciais, o que sen dúbida contribuiría a descargar os xulgados de preitos innecesarios, indicou.