Non hai interese en cubrir os postos vacantes no mercado de Frei Xoán de Navarrete
Por Redacción
Os seis locais vacantes no mercado municipal da rúa de Frei Xoán de Navarrete non espertaron interese algún. A convocatoria para cubrir estes postos quedou deserta. O Concello non recibiu ningunha proposta durante o prazo habilitado para elo, aberto desde o pasado 5 de xuño. Durante o procedemento tampouco se presentou alegación algunha, polo que o expediente concluirá unha vez que a Xunta de Goberno Local o aprobe definitivamente.
A concelleira de Promoción Económica, Carlota Román, sinalou que o goberno municipal "fixo o que tiña que facer e lle demandaban os comerciantes alí asentados", sacando a concurso os espazos vacantes a uns prezos que, entende, "non teñen competencia". Lamentablemente, engadiu, non hai interese empresarial en facerse con estes locais, polo que seguirán baleiros.
A iniciativa englobaba seis locais, aínda que, en realidade, tratábase de cinco, toda vez que dous deles están unidos. En concreto, os locais 17 e 19 (15,51 metros cadrados), o 18 (11,17 metros cadrados), o 20 (17,30 metros cadrados), o 21 (10,23 metros cadrados) e, finalmente, o local número 22, con 12,23 metros cadrados. Todos eles están situados na galería do edificio apegado á entrada principal do hospital Miguel Domínguez.
Os locais foron ofertados por un período concesional de 25 anos. Os licitadores debían presentar ofertas que, como mínimo, cubriran o importe das taxas fixadas no prego de condicións, que oscilaban entre os 20.331,64 e os 32.968,86 euros.
Carlota Román destacou que con Frei Xoán de Navarrete tratábase de dar un segundo paso na regularización administrativa dos mercados municipais do centro urbano. Lembrou que está a rematar a adxudicación dos postos vacantes na Praza de Abastos conforme ás ofertas recibidas. A edil agarda que todo o procedemento poda estar rematado en setembro ou outubro, tras revisar as ofertas e o correspondente dereito de tanteo entre os titulares dos postos contiguos.
Relacionadas:
-
María Biempica pide unha xestión eficiente da praza de Abastos
Por Mónica Patxot |
-
Formación para os novos vendedores do Mercado de Abastos
Por Oskar Viéitez |
-
Os locais vacantes en Frei Xoan de Navarrete poderán solicitarse ata o 9 de xullo
Por Redacción |
-
Saen a concurso os cinco locais vacantes do mercado de Frei Juan Navarrete
Por Oskar Viéitez |