Máis de 6.000 persoas participaron en Expocidades, a mostra turística do Eixo Atlántico
Por Redacción
Unhas 6.000 persoas participaron, segundo a organización, na segunda edición da feira Expocidades, a mostra de turismo das cidades galegas e portuguesas que integran o Eixo Atlántico. Durante tres días, Pontevedra acolleu un evento cheo de actividades que buscaba promover as ofertas e atractivos turísticos dos 27 destinos de ambas as dúas rexións que participaron nesta iniciativa.
Pola carpa instalada na céntrica Praza de España achegáronse uns 2.500 visitantes, interesados en organizar pequenas escapadas de fin de semana ou períodos vacacións nalgunha destas cidades. Tal foi a boa acollida desta iniciativa que as instalacións, abertas en horario de mañá e tarde, tiveron que atrasar o seu peche na xornada do sábado debido á grande afluencia de curiosos.
Ademais da información turística propiamente dita, os postos ofreceron numeras degustacións, como os viños da Ribeira Sacra, Porto ou Viana do Castelo ou o tradicional pan doce portugués.
A programación de Expocidades completouse con varias exhibicións de cociña na Praza de Abastos, onde varias localidades presentaron algúns dos seus produtos gastronómicos, visitas teatralizadas polo centro histórico ou un paseo en barco pola ría.
Durante os tres días da mostra varios blogueiros especializados en turismo e gastronomía foron narrando en tempo real as actividades desta feira turística que revalidou o éxito alcanzando na pasada edición celebrada en Lugo.