Técnicos do Areeiro descobren unha nova praga que ameaza os buxos da provincia
Por Redacción
Os técnicos da Estación Fitopatolóxica do Areeiro descubriron a presenza dunha nova praga que acaba de introducirse na Península Ibérica e que afecta ao buxo. Esta praga localizouse a raíz das análises dunhas mostras desta planta ornamental en Tomiño e, tras unha inspección pola zona, comprobouse que o insecto está a afectar a varias zonas do Baixo Miño.
Trátase dunha Cydalima Perspectalis, unha bolboreta cuxas larvas comen as follas do buxo e pode chegar a matalo polo ataque á codia. Hai dous anos arrasou amplas áreas destas plantas en Basilea (Suíza) pero, ata o momento, a súa presenza non se detectara nin en España nin en Portugal.
Este insecto procede de Asia e o método máis probable para introducirse en Galicia, segundo os técnicos, é o do comercio internacional, de forma que algunha persoa ou viveiro adquirise plantas en puntos nos que esta praga existe e agora se teña trasladado a Galicia.
Os técnicos do Areeiro indican que os Cydalima Perspectalis detectada na provincia sería a primeira xeración de insectos e, por ese motivo, provoca menos danos. Non obstante, a segunda causaría un desecamento masivo das plantas, segundo indican.
Dende a Estación Fitopatolóxica de Areeiro recomendan o tratamento a base de piretroides para frear a súa evolución porque, pola contra, supoñería unha seria ameaza para as poboacións de buxo tanto silvestres como en xardíns, moi habituais na provincia de Pontevedra.
PRAGA QUE AFECTA AOS CASTIÿEIROS
Dende a Estación tamén se detectou a entrada, hai un mes, dunha nova praga forestal que afecta os castiñeiros. Segundo explicou o director da Estación do Areeiro, Pedro Mansilla, a praga procede do Xapón e foi detectada en Ourense.
O centro que depende da Deputación de Pontevedra xa está a preparar, segundo o director, a solta de parásitos que, mediante a loita biolóxica, combaterán unha enfermedade que pode chegar a ser grave tendo en conta que Galicia é a primeira rexión produtora de castiñeiros de España.