Pedro Sánchez, primeiro candidato á Secretaría Xeral do PSOE que visitará Pontevedra
Por Redacción
Pedro Sánchez será o primeiro candidato á Secretaría Xeral do PSOE que visitará Pontevedra para manter un encontro con militantes e simpatizantes socialistas. Aceptou o convite que a executiva local en Pontevedra trasladou a todos os que se postularon para dirixir o partido.
Este encontro celebrarase o próximo luns 23 de xuño, a partir das 13.15 horas, na sede do PSdeG-PSOE en Pontevedra, situada na rúa Irmáns Nodales.
Agustín Fernández adianta que aínda que se trata dun acto previsto para militantes, a entrada será libre para os simpatizantes que desexen acudir.
A executiva local do PSdeG-PSOE abre este proceso, ao considerar que os militantes pontevedreses "deben contar coa máxima información para comparar entre as distintas propostas e exercer así o seu dereito ao voto a partir dun debate de ideas e de contraste coas necesidades da sociedade actual".
Esperan que o resto das persoas que deron un paso á fronte acepten o convite dos socialistas pontevedreses. Ademais de Pedro Sánchez, deputado socialista por Madrid, anunciaron a súa intención de presentarse ás primarias Eduardo Madina, secretario xeral do grupo parlamentario do PSOE no Congreso; Alberto Sotillos, militante de base en Madrid; e José Antonio Pérez Tapias, candidato da corrente Izquierda Socialista.