O Porto de Sanxenxo ingresa no club nacional de excelencia ao lograr a Q de calidade turística
Por Redacción
"En todo o país tan só hai 17 portos galardoados coa Q de Calidade Turística e dous deles están no Concello de Sanxenxo o que supón un gran recoñecemento para o noso municipio", sinalou esta mañá a alcaldesa, Catalina González, tras recoller en Madrid as bandeiras que distinguen os servizos e as prestacións das que dispoñen tanto o Porto Deportivo Juan Carlos I de Sanxenxo, de titularidade pública; como as instalacións do Club Náutico de Portonovo.
O ministro de Industria, Enerxía e Turismo, José Manuel Soria, entregou a bandeira 'Q de Calidade Turística' á rexedora sanxenxina durante un acto que estivo tamén presidido pola secretaria de Estado de Turismo, Isabel Borrego, e o responsable do Instituto para a Calidade Turística Española, Miguel Mirones.
"Con este novo recoñecemento avanzamos na nosa tarefa de manter e mellorar día a día o posicionamento do porto sanxenxino como un dos referentes nacionais e internacionais, de aí o esforzo que vén desenvolvendo a empresa municipal que xestiona as instalacións en canto ao investimento en novos servizos para os usuarios deste equipamento", comentou González.
Neste sentido, a rexedora recordou que a construción do porto supuxo "un importante impulso turístico xa que complementa a tradicional oferta de sol e praia e propicia a posibilidade de practicar náutica recreativa e deportiva contando para iso con instalacións de primeiro nivel".
O municipio dispón do maior número de selos en Galicia de Q de Calidade Turística
Catalina González insistiu ademais na aposta do goberno local porque a marca Sanxenxo sexa sinónima de calidade "polo que dende a administración pública debemos dar exemplo ao sector privado para entre todos lograr este obxectivo tan beneficioso para o conxunto da cidadanía". Non en van, o municipio dispón do maior número de selos en Galicia de Q de Calidade Turística e certificacións do Sistema Integral de Calidade Turística en Destinos, ademais de encabezar en España o eco distintivo Bandeira Azul.
"Este camiño xa non ten retorno e debemos continuar traballando dende os distintos estamentos nesta liña que nos diferencia doutros destinos turísticos tradicionais e fainos máis competitivos", apuntou a alcaldesa.