Fiscalía pide catro anos de prisión para un pai acusado de intentar agredir sexualmente a súa filla
Por Oskar Viéitez
A Sección Segunda da Audiencia provincial de Pontevedra sinalou para este martes día 13 un xuízo por un delito de agresión sexual en grao de tentativa.
Segundo informou o Tribunal Superior de Xustiza de Galicia (TSXG), a Fiscalía pide catro anos de prisión para un home ao que acusa de ter intentado manter relacións sexuais á forza coa súa filla. Ela conseguiu golpealo cun vaso na cabeza, conseguindo que saíse do cuarto, e así poder pedir auxilio. O acusado estaba baixo os efectos do alcohol.
INCENDIO EN MASA FORESTAL
Por outra parte a Sección Cuarta da Audiencia provincial fixou para esa mesma xornada un xuízo con tribunal do xurado por un caso de incendio de masa forestal. Todo indica que non se celebrará a vista oral xa que as partes alcanzaron un acordo de conformidade, segundo informou o TSXG.
En virtude dese acordo, o acusado aceptará unha condena dun ano de prisión e multa de doce meses con cota diaria de tres euros por prender lume cun chisqueiro o 10 de outubro de 2011 ao monte situado fronte ao seu domicilio, no concello de Meis, "co ánimo de lograr a queima de montes e de prexudicar o equilibrio dos sistemas naturais".
A resolución rápida deste caso permite a esta mesma sala sinalar para este mesmo día 13 outro xuízo, neste caso por un delito contra a Saúde Pública. Trátase de dous acusados para os que o fiscal pide para cada un cinco anos de prisión. Acúsaos de terse posto de acordo para a compra en Madrid de case un quilo de cocaína presuntamente destinada á venda. A policía detivo a muller cando regresaba por estrada coa droga.