A xuízo por comprar 60.000 euros en billetes falsos ao fillo de Pablo Vioque
Por Natalia Puga
Unha moza da Estrada sentarase este martes no banco dos acusados da Audiencia Provincial de Pontevedra para render contas por un delito de adquisición de moeda falsa para a súa posta en circulación en grao de tentativa por negociar co fillo do coñecido avogado e narcotraficante Pablo Vioque para adquirir 60.000 euros en billetes falsos.
Segundo informou o Tribunal Superior de Xustiza de Galicia (TSXG), o xuízo previsto na Sección Segunda da Audiencia resolverase cunha conformidade entre a acusada, M.C.G., e a Fiscalía, que pide inicialmente tres anos e medio de prisión e unha multa de 120.000 euros.
A Fiscalía sostén que a acusada tivo coñecemento de que o fillo de Pablo Vioque dispoñía de numerosos billetes falsos e en abril de 2011 acordou pagarlle 3.000 euros a cambio dunha partida de billetes por valor de 60.000 euros.
Segundo recolle a acusación do fiscal, os billetes de Pablo Vioque Lage, o fillo do coñecido avogado xa falecido, non eran de curso legal pero "unha persoa non experta na materia non advertiría a diferenza". A acusada recibiu un billete de mostra en abril de 2011 e, tras comprobar esta aparencia de legalidade, comproulle 120 billetes falsos de 500 euros a cambio de 3.000 euros de curso legal.
A acusada, segundo o fiscal, enviou a Madrid a un home de confianza para recoller ese diñeiro, pero foi detido xunto a Pablo Vioque Lage en Majadahonda (Madrid) cando llos ía entregar. Iso implicou que a muller non chegou a poñer en circulación o diñeiro falso, de aí que o seu delito que se lle atribúe sexa en grao de tentativa. Pagou o diñeiro, pero nunca o recibiu e, polo tanto, non o usou.
Pablo Vioque Lage e o home de confianza de M.C.G. xa foron condenados por estes feitos por outro xulgado mentres que a agora acusada xa fora citada para xuízo antes, pero a vista tivo que aprazarse. Está en liberdade provisional por estes feitos tras pagar unha fianza de 12.000 euros.