Denuncian que Construcciones Crespo busca a liquidación para deixar a 90 traballadores na rúa
Por Redacción
Os noventa traballadores da empresa Construcciones Crespo reclaman unha reunión coa dirección para intentar buscar algunha fórmula que salve esta construtora que se encontra en concurso de acredores dende o 30 de xaneiro de 2014. Segundo denunciou Xaquín Agulla, do sindicato CIG, a dirección de Construcciones Crespo busca a liquidación a pesar de que conta con carga de traballo. Os representantes sindicais demandan que se explore a posibilidade de encontrar viabilidade a través dunha xunta de acredores.
Actualmente, os traballadores vense afectados por un expediente de regulación de emprego (ERE) suspensivo dende o 20 de setembro de 2013, que fora proposto polo propio equipo como opción para buscar unha saída viable á empresa. De feito, afirman que tamén a metade do persoal, que contaba con salarios superiores aos do convenio, decidiu aceptar unha redución do seu soldo durante o último ano.
A empresa foi a un procedemento denominado 'proposta anticipada de convenio' para intentar chegar a un acordo cos acredores pero ningún deles se mostrou interesado en adherirse a esta proposta. Por ese motivo, a semana pasada a dirección decide asumir a liquidación "para desfacerse dun xeito cómodo de traballadores e da débeda contraída con acredores", segundo apuntaba Xaquín Agulla, da CIG, que ofreceu unha rolda de prensa acompañado por un grupo de traballadores e por Luis Rodas de CC.OO.
Os sindicatos aseguran que a dirección da empresa ten tomada a decisión de liquidar a entidade dende hai tempo e que foi o cadro de persoal o que evitou que se levase a cabo. Xaquín Agulla afirma que Construcciones Crespo ten un volume de obra por executar de ao redor de tres millóns de euros e un superávit de máis de 500.000 euros e acusa o propietario de falta de sensibilidade pola súa intención de pechar a empresa.
O cadro de traballadores está formado por empregados, na maioría dos casos, de máis de 20 anos de antigüidade e con idades que superan os 50 anos. Para o luns vindeiro teñen convocada unha asemblea para tomar unha decisión sobre a posibilidade de iniciar unha campaña de protesta.
Relacionadas:
-
Os traballadores cren que as contas ofrecidas por Construcciones Crespo non xustifican o peche
Por Redacción |
-
Montajes Novarue, unha empresa naval de Marín, pecha deixando 70 traballadores na rúa
Por Redacción |
-
O xulgado autoriza a liquidación de Construcciones Crespo
Por Redacción |
-
Traballadores de Construcciones Crespo concéntranse ante a sede da empresa
Por Redacción |
-
Dous días de folga en Construcciones Crespo para evitar o peche da empresa
Por Oskar Viéitez |
-
Os traballadores de Construcciones Crespo decidirán o venres 9 se asumen unha folga
Por Redacción |
-
Construcciones Crespo entra en concurso de acredores
Por Redacción |