A Xunta publica este martes, no Portal de Contratos, a licitación por importe de 11.168.455 euros do acordo marco para a prestación de servizos sanitarios da área sanitaria de Pontevedra e O Salnés, que atende a unha poboación de ao redor de 300.000 persoas.

Esta contratación, que ten unha duración de catro anos, ten como finalidade a prestación de servizos sanitarios á poboación, tanto de tipo preventivo como asistencial e rehabilitador, de especial relevancia debido ao aumento da esperanza de vida, á cronicidade dos procesos e á presenza de dependencia e de discapacidades.

O Executivo galego explica que o impacto que desde o ano 2020 provocou a pandemia da covid "obrigou á reorganización do sistema sanitario para afrontar o importante incremento de pacientes xerados por esta enfermidade, sen deixar de atender ao resto de doentes".

Os servizos sanitarios que se proporcionarán á poboación inclúen, entre outras, as seguintes prestacións: procesos de área médica, cirurxía xeral, cirurxía ortopédica e traumatoloxía, uroloxía, cirurxía vascular, otorrinolaringoloxía de alta, media e baixa complexidade, consultas, procedementos de diagnóstico ambulatorios, e neuro-rehabilitación.

"Estímase o acordo marco como o procedemento máis idóneo, por ser o mellor sistema a efectos de racionalización da contratación pública, e para acadar unha mellor eficiencia na tramitación dos expedientes, ao tratarse de prestacións de servizos de uso común en todos os centros sanitarios desta área", xustifica a Xunta.

"Os servizos obxecto deste acordo marco resultan imprescindibles para dar unha axeitada asistencia sanitaria a pacientes do Servizo Galego de Saúde, con carácter complementario dos servizos propios", engade. Trátase de prestacións incluídas na carteira de servizos comúns do Sistema Nacional de Saúde.

Por razóns de accesibilidade dos pacientes, o servizo de asistencia sanitaria complementaria aos usuarios do Servizo Galego de Saúde "prestarase a toda a poboación desta área coas mesmas garantías, reducindo as desigualdades sanitarias e homoxeneizando e mellorando o acceso dos usuarios ás prestacións complementarias". 

Así mesmo, a Xunta asegura que "con esta contratación mellórase a calidade da asistencia sanitaria así como a redución das listas de espera para a realización de intervencións cirúrxicas, ademais de velar polo cumprimento dos obxectivos de estabilidade orzamentaria e control do gasto, levando a cabo unha eficiente utilización dos fondos públicos".

As empresas interesadas na prestación deste servizo teñen de prazo ata o 31 de outubro para presentar as súas ofertas.