O condutor dun turismo Mustang que o pasado sábado supostamente provocou un accidente mortal en Sanxenxo no que faleceu un matrimonio está a ser investigado como presunto autor dun delito de homicidio por imprudencia. 

Fontes oficiais da Garda Civil confirmaron que o caso está xudicializado nos xulgados de Cambados e ao sospeitoso notificóuselle a súa condición de investigado. 

O condutor, de orixe portuguesa, circulaba co seu Mustang a unha velocidade supostamente excesiva nun tramo limitado a 50 quilómetros por hora. 

A Garda Civil está a investigar as circunstancias do ocorrido. O accidente produciuse na tarde do sábado e consistiu nunha colisión frontolateral.

De momento, está en investigación como se produciu esa colisión, aínda que unha das hipóteses facilitadas polas autoridades apunta a que o condutor do Mustang invadiu o carril contrario. Outras fontes apuntan a que non se produciu esta invasión. 

Como consecuencia do impacto, faleceu un matrimonio septuaxenario de Sanxenxo. O marido foi un traballador municipal xa xubilado, coñecido na localidade por conducir o camión de Sanxenxo durante anos. 

No Mustang de cor vermella circulaban o condutor e outras dúas persoas, que resultaron feridas. 

O subdelegado do Goberno en Pontevedra, Abel Losada, mostrou este luns a súa "solidariedade e agarimo coa familia" das dúas persoas falecidas no accidente de tráfico. 

Losada tamén quixo mostrar a súa "enorme preocupación" pola repetición dun "patrón de accidentalidade cada vez máis habitual" que se detectou. Trátase de "condutas  imprudentes vinculadas a exceso de velocidade coa invasión de carrís contrarios e choques frontolaterais". 

Este tipo de accidentes, segundo indica Losada, "case sempre teñen consecuencias dramáticas para as persoas", de modo que considera que "son cada vez máis necesarios e máis importantes as campañas de prevención" que se desenvolven desde a Dirección Xeral de Tráfico e por parte da Garda Civil de Tráfico. 

O subdelegado tamén aproveitou para insistir en que "nin a titularidade da estrada nin o estado da mesma" adoitan estar tras estes accidentes, senón que "detrás adoitan estar esas condutas imprudentes que lamentablemente custan vidas". E apela á responsabilidade dos condutores.

MINUTO DE SILENCIO 

A Corporación municipal de Sanxenxo gardou ao mediodía deste luns un minuto de silencio polos dous falecidos. Foi na entrada da Casa Consistorial.