A provincia de Pontevedra foi o "destino líder de Galicia" este verán
Por Oskar Viéitez
"A provincia de Pontevedra converteuse este verán no destino líder de Galicia", destacou este venres nunha comparecencia o presidente da Deputación de Pontevedra, Luis López, en referencia aos datos do Instituto Nacional de Estatística que reflicten que esta provincia incrementou case un 11% o número de visitantes entre os pasados meses de xuño e agosto, "rexistrando preto de 700.000 persoas".
Segundo detallou Luis López, soamente en agosto foron preto de 300.000 persoas, case un 12% máis que no mesmo mes do ano 2023.
Outro dato que celebrou o presidente provincial foi o incremento dun 4% da ocupación hostaleira este verán con respecto ao ano 2023, "o que nos sitúa como líderes nunha clasificación, por encima doutros destinos no que a ocupación hostaleira refírese", dixo en referencia ás Rías Altas, a Costa Morte ou a Mariña Lucense.
Luis López situou "como dato máis significativo desta análise", que as Rías Baixas incrementaron un 25% a presenza de turistas estranxeiros a pasada campaña estival en relación coa do ano anterior.
"Foron un total de máis de 200.000 visitantes chegados de fóra do territorio nacional", principalmente de destinos como Portugal, Francia e Alemaña, segundo apuntou.
Para o presidente da Deputación de Pontevedra, estes datos, "sen ningunha dúbida revalidan o noso esforzo", en relación coas iniciativas de promoción internacional da provincia, "vemos que xa están a dar os seus froitos. Así que, imos polo bo camiño", concluíu.
Relacionadas:
-
O Concello solicitará á Xunta que dea de baixa ás viviendas de uso turístico do centro histórico sen licenza municipal habilitante
Por Anxo Lourido |
-
O anuncio turístico '100% Rías Baixas', medalla de prata á mellor película no Terres Travel Festival de Tortosa
Por Redacción |
-
125.000 euros da Deputación destínanse ao patrocinio do Campionato de Europa de Vela en Sanxenxo
Por Anxo Lourido |
-
En xullo e agosto houbo 2,8 millóns de vehículos de paso pola provincia de Pontevedra, a cifra máis alta dende 2019
Por Oskar Viéitez |