O plan +Xuventude repartiu 80.000 euros entre 17 colectivos para apoiar o talento mozo da provincia
Por Oskar Viéitez & Mónica Patxot
O presidente da Deputación de Pontevedra, Luis López, celebrou o "acerto" que, ao seu xuízo, supuxo o lanzamento do programa +Xuventude, "a primeira liña de apoio específico para a xuventude aprobada polo organismo provincial", pola acollida que tivo por parte de particulares e colectivos da provincia, así como pola colaboración para a posta en marcha de proxectos "que demostran o talento, a formación, a capacidade de emprendemento e a sensibilidade polo futuro da súa terra da xente nova".
Acompañado polo responsable de área de Xuventude, Jorge Cubela, o mandatario provincial participou este xoves no Salón de Plenos do Pazo provincial no encontro no que beneficiarios da primeira convocatoria de subvencións deste plan presentaron os seus proxectos, polos que reciben preto de 80.000 euros por parte da Deputación.
"Esta é unha fantástica panca de apoio para o talento mozo da provincia", sentenciou.
Despois de escoitar as razóns e os obxectivos que levaron aos participantes a deseñar estes proxectos, Luis López comentou que "non é ningunha sorpresa que a xente nova estea comprometida polo futuro da súa provincia, non é ningunha sorpresa que a xeración máis formada poña o seu talento ao servizo da súa terra e, está claro, tampouco é ningunha sorpresa a presentación de tantos proxectos tan interesantes, innovadores e sólidos".
O presidente provincial recoñeceu "as boas ideas e o compromiso coa provincia da mocidade".
O programa +Xuventude trátase dunha convocatoria de subvencións para apoiar iniciativas de interese social promovidas asociacións xuvenís da provincia ou persoas con idades comprendidas entre os 18 e 35 anos e que, nesta primeira edición, reparte un total de 77.000 euros entre 17 colectivos, que reciben cada unha un máximo de 5.000 euros, para a posta en marcha de iniciativas relacionadas coa cultura, a música, as artes, o deporte, a promoción de hábitos de vida saudable, a inclusión, a natureza, a ecoloxía, a ciencia, a divulgación, o ocio ou o patrimonio en concellos de todas as comarcas da provincia.
A Deputación mobiliza 1,2 millóns de euros en programas xuvenís, dende bolsas para facer prácticas laborais no estranxeiro, premios ao talento, promoción do asociacionismo a través da mellora dos locais para a mocidade co plan O Teu Espazo Xuvenil, ou a colaboración coa xente nova para a redacción do primeiro Plan Estratéxico par a Xuventude.
Relacionadas:
-
Héctor Abad Faciolince, Manel Loureiro ou Arantza Portabales, no encontro Pontevedra Literaria
Por Redacción |
-
Pasalo ben pasándoo mal coas novas visitas teatralizadas por Samaín ao castelo de Soutomaior
Por Oskar Viéitez |
-
Unha xornada lúdica e formativa dirixida ao movemento asociativo
Por Oskar Viéitez |